كرەمل ماڭىزدى اكتيۆتەرىنىڭ باسىم بولىگىن باتىسپەن "ءبولىسىپ" جاتقان قازاقستاننىڭ ساياسي شەشىمىنە الاڭداۋشىلىق تانىتىپ وتىر، دەپ حابارلايدى Dalanews.kz.
وسى تۇستا رەسەيلىك مەديا ەلدەگى بىرنەشە ماسەلەنى العا تارتادى.
سونىڭ ءبىرى - قازاقستاننىڭ 20-دان استام اۋەجايىن ەۋروپادان كەلگەن ينۆەستورلاردىڭ باسقارۋىنا بەرۋگە بايلانىستى شەشىمى. ءيا، كولىك ءمينيسترى مارات قارابايەۆ بىرنەشە كۇن بۇرىن وسىنداي مالىمدەمە جاساعان ەدى.
ءقازىر استانا مەن الماتى اۋەجايلارى شەتەلدىك كومپانيالاردىڭ باقىلاۋىندا. سونىمەن قاتار قارابايەۆ كاسپيي تەڭىزىنىڭ جاعاسىنداعى قۇرىق جانە اقتاۋ پورتتارى دا كەيىن جەكەشەلەندىرۋ مۇمكىندىگىمەن ەۋروپالىق كومپانيالاردىڭ باسقارۋىنا بەرىلەتىنىن ايتقان.
رەسەيلىك پروپاگاندا بۇدان بولەك “قارا التىندى” وندىرۋدە اقش-تىڭ كوش باستاپ تۇرعانىنا الاڭداۋلى. 2023 جىلى امەريكالىق كومپانيالار قازاقستانداعى مۇنايدىڭ 30،9%-ىن، ەۋروپالىق كومپانيالار 18،4%-ىن، جۇڭگو 11،4% ءوندىردى. رەسەيدىڭ ۇلەسى ءتورت پايىزعا دا جەتپەيدى.
قازاقستان اۋماعىندا انگلوساكسوندىق قۇقىقتىق جۇيە نەگىزىندە جۇمىس ىستەيتىن “استانا” حالىقارالىق قارجى ورتالىعى دا ماسكەۋ يدەولوگتارىنىڭ قىتىعىنا تيۋدە.
"استانا اقش-تىڭ اسكەري بيولوگيالىق زەرتحانالارىنا ەسىك اشىپ بەردى. ەلدە ورىسفوبيا اسقىنىپ تۇر. 2025 جىلعا قاراي قازاق ءتىلى كيريلليسادان لاتىنعا اۋىسىپ، "ۇلى" ورىس ءتىلىن تۇنشىقتىرىپ تىنباق.
اربىردەن سوڭ مۇنىڭ بارىنە نازاربايەۆ كىنالى. مەملەكەتتىڭ باعىت-باعدارىن باتىسقا قاراي بۇرعان وسى ەلدىڭ ەكس-پرەزيدەنتى. 2017 جىلى لاتىن الىپبيىنە كوشۋ تۋرالى جارلىققا دا قول قويعان نازاربايەۆ ەكەنىن ۇمىتپايىق"، - دەيدى رەسەيلىك تەلەگرام ارنالار.
كرەملدى باتىستىڭ دەمەۋشىلىگىمەن جانە قازاقستاننىڭ قاتىسۋىمەن وتەتىن ايتۋلى ءىس-شارالار سانىنىڭ ارتۋى دا الاڭداتىپ وتىر.
29-30 قاڭتاردا بريۋسسەلدە ەۋروپالىق وداق پەن ورتالىق ازيا ەلدەرى اراسىندا كولىك بايلانىسىن دامىتۋ ماقساتىندا Global Gateway ينۆەستورلار فورۋمى وتكەن. مۇندا قازاقستان، قىرعىزستان، تاجىكستان، تۇركىمەنستان، وزبەكستان مەملەكەتتەرى توبە كورسەتكەنىن بىلەمىز.
باتىس بيزنەسمەندەرى الداعى 5 جىلدا قازاقستاننىڭ كولىك سالاسىنا 40 ميلليارد ەۋرو كولەمىندە ينۆەستيسيا تارتۋدى كوزدەپ وتىر. وسىعان بايلانىستى ەو كومپانيالارى اۆياسيا، تەمىرجول جانە تەڭىز تاسىمالى سالاسىنداعى جاڭا جوبالارعا بەلسەندى قاتىسۋعا شاقىرىلۋدا.
قالا بەردى، رەسەيلىك پروپاگاندا 2023 جىلى 19 قىركۇيەكتە نيۋ-يوركتە ورتالىق ازيا-اقش ءسامميتى (C5+1) وتكەنىن دە ەسكە سالعان. وندا اقش پرەزيدەنتى قازاقستان، قىرعىزستان، تاجىكستان، تۇركىمەنستان جانە وزبەكستان پرەزيدەنتتەرىمەن كەزدەسكەن بولاتىن.
اتاپ ايتقاندا، “ورتالىق ازيانىڭ وراسان زور مينەرالدىق بايلىعىن يگەرۋ جانە ماڭىزدى پايدالى قازبالاردىڭ قاۋىپسىزدىگىن جاقسارتۋ ءۇشىن C5+1 ماڭىزدى پايدالى قازبالار بويىنشا ديالوگ” وتكىزگەنىن العا تارتادى.
كرەملدەن تىكەلەي قارجى الاتىن تەلەگرام ارنالاردىڭ پىكىرىنشە، امەريكا قازاقستاننىڭ ەڭ الدىمەن ۋرانىنا قىزىعۋشىلىق تانىتۋدا.
"باتىستىڭ قازاقستاندى وزىنە باعىندىرۋعا دەگەن قۇلشىنىسى كۇشەيىپ تۇر.
قازاقستاننىڭ ەكونوميكالىق اكتيۆتەرىنىڭ بىرتە-بىرتە باتىستىڭ قولىنا ءوتۋى استانا ساياسي جانە يدەولوگيالىق سالاسىنا اسەر ەتپەي قويمايدى. بۇل ەل ءتۇپتىڭ تۇبىندە “ۋكراينا-2” بولۋى مۇمكىن.
قازىردەن باستاپ ارەكەت كوشۋ قاجەت. باتىستىڭ جولىن كەسىپ، استانا ءۇشىن "قىزىل سىزىقتى" ايقىنداماساق، 10-15 جىلدان كەيىن قازاقستاندا “ۋكراين كەيسى” پايدا بولادى"، - دەيدى ولار.
