تاياۋدا Elmedia كانالىندا گۇلجان ەرعالييەۆاعا سۇحبات بەرگەن وپپوزيسيالىق ساياساتكەر بولات ءابىلوۆ نازاربايەۆقا قاتىستى كوپشىلىك بىلمەيتىن ءبىر شىندىقتى ايتتى، – دەپ حابارلايدى Dalanews.kz.
2000 جىلداردىڭ باسىندا نۇرسۇلتان نازاربايەۆ تەڭىز كەنىشىن ساتۋدان تۇسكەن قارجىدان 500 ملن دوللاردى ەۋروپا بانكتەرىندە ءوز اتىنان قۇپيا ەسەپشوت اشىپ، سالىپ قويادى. ارادا ءبىرشاما ۋاقىت وتكەننەن كەيىن الگى قۇپيا ەسەپشوتقا قاتىستى اقپارات قوعامدىق ورتاعا ءمالىم بولادى.
وسىدان كەيىن سول كەزدە ۇكىمەت باسشىسى بولعان يمانعالي تاسماعامبەتوۆ پارلامەنت دەپۋتاتتارى الدىندا نۇرسۇلتان نازاربايەۆ ەل مۇددەسىنە ارنال5ان اقشانى ەشكىمگە سەنبەگەن سوڭ ەۋروپا بانكتەرىنە اۋدارىپ، ءوز اتىنان ەسەپشوت اشىپ، سالىپ قويعانىن كورەگەندى ءىس رەتىندە كورسەتۋگە تىرىسقان بولاتىن.
تاسماعامبەت مۇنىڭ الدىندا اتىراۋ وبلىسى اكىمى بولعاندا قىزدى-قىزدىمەن ءوزىن "نازاربايەۆتىڭ ءونىمى" دەپ اتاپ جىبەرگەنى ەسىمىزدە. يمەكەڭنىڭ اۋزىنان شىققان الگى ءبىر ءسوزى سول زاماتتا قازاق دالاسىنا ەلەكتر قۋاتى سەكىلدى تاراپ، سوڭىنان ەلەس سەكىلدى ءالى كۇنگە دەيىن قۋىپ جۇرگەنىن بىلەمىز.
ەندى يمەكەڭدى جايىنا قالدىرىپ، نەگىزگى اڭگىمەمىزگە ورالساق.
نازاربايەۆ شەتەلدىك بانكتەن ءوز اتىنا قۇپيا شوت اشىپ، قىرۋار قارجىنى سالىپ قويعانى اشكەرە بولعاننان كەيىن، دۇنيەجۇزى ەلدەرى اتامىزدى قازىناعا قول سالعان جەبىر باسشى، ديكتاتور رەتىندە تاني باستادى.
نۇرەكەڭ قانشا اقتالسا دا، ونى باتىس ەلدەرى بىلىققا باتقان باسشى رەتىندە قابىلداۋىن قويعان جوق.
وسىدان كەيىن اتامىز ءبىراز ۋاقىتقا دەيىن الدىنا كەلىپ، كەزدەسكەن ادامدارعا ءوزىنىڭ ادال باسشى ەكەنىن ايتىپ سەندىرۋگە تىرىسسا كەرەك.
بولات مۇقىش ۇلى سول وقيعانىڭ قىزۋى باسىلماي تۇرعان كەزدە نازاربايەۆپەن كەزدەسكەندە اتامىزدىڭ قالاي اقتالعانىن گۇلجان ەرعالييەۆعا اڭگىمەلەپ بەردى.
بوكەڭنىڭ ايتۋىنشا، اتامىز ءوزىن سۇتتەن اق، سۋدان تازا ەتىپ كورسەتۋ ءۇشىن پۋتيننەن اقىل سۇراپ، كەڭەسىنە قۇلاق اسقانعا ۇقسايدى. سول كەزدەسۋدە نازاربايەۆ ابىلوۆكە بىلاي دەگەن ەكەن.
– مىنا قۋلىعىنا قۇرىق بويلامايتىن امەريكاندىقتار مەنىڭ ۇزاق جىلدار بويى جيناعان ابىروي-بەدەلىمدى ءتۇسىرۋ ءۇشىن ەۋروپاداعى بانكتەردىڭ بىرىنەن مەنىڭ اتىمنان جەكە شوت اشىپ، جۇزدەگەن ميلليون دوللار سالىپ، ابىرويىما نۇسقان كەلتىرۋدى كوزدەگەن. مۇنى ماعان پۋتين ايتتى، – دەپ ءابىلوۆتىڭ الدىندا اقتالعان عوي.
بۇل – ءپۋتيننىڭ ستيلىندەگى ەرتەگى ەكەنى انىق. بۇعان پروپاگاندامەن ساناسى ابدەن ۋلانعان، اقش-تى اتا جاۋى سانايتىن ورىستىڭ مۇجىعى سەنەتىنى انىق.
ال قازاقتاردى "قۇلاققا تەپكەن" بۇل اڭگىمەنى ايتىپ، سەندىرۋ مۇمكىن ەمەس. مۇنى كەيىننەن جاقسى تۇسىنگەن نازاربايەۆ بۇل نۇسقانى اقپارات قۇرالدارىندا اشىق تاراتۋعا ءداتى جەتپەسە كەرەك.
ەگەر سول كەزدە اتامىز ءپۋتيننىڭ كەڭەسىنە قۇلاق اسىپ، ەل ىشىندە وسى اقپاراتتى تاراتقاندا امەريكا نۇرەكەڭنىڭ ەزۋىن ءتىلىپ، اتامىزدىڭ بۇدان باسقا دا بىلىقتارىن الدىنا قويىپ بەرگەن بولار ەدى.
سول كەزدە نازاربايەۆ اۋزىنان "اۆاريا" بولسا، ونىڭ رەجىمى 30 جىلعا سوزىلماس ەدى.
ءبىراق نازاربايەۆ شەتەلدىڭ بانكىندەگى قۇپيا ەسەپشوتى بەلگىلى بولعاننان كەيىن ونى جەكە باستىڭ مۇددەسىن كوزدەپ اشقانىن ەش ۋاقىتتا مويىنداماعانىن بىلەمىز.
