«ءبىر سۇقباتىندا ساكەن مايعازييەۆ ادەتتەگىسىنشە Ninety One توبى تۋرالى وي تولعاپ، «ادام تانيتىنداي، مەيىرلەنە قۇشاقتايتىنداي، سۇيەتىندەي، اتا-انالارى قالاي جاقسى كورەتىنىن مەن بىلمەيمىن. قالاي ولارعا ۇيرەتپەيتىنىن، مەنىڭ جۇرەگىم اۋىرادى. ءوزىم ءۇشىن ەمەس، ۇرپاقتارىم ءۇشىن»، – دەپتى. اتاپ ايتساق، ساكەن بۇدان بۇرىن دا توپ مۇشەلەرىنىڭ بولمىسىنا سىن ايتىپ، بىرەسە جاقتاپ، بىرەسە داتتاپ جۇرگەن-دى. 2 جىل ۇندەمەي كەلە جاتقان بىزگە، بۇل سوزدەر شەكتەن شىققاندىق بولىپ كورىندى. قاناتتىعا قاقتىرماي، تۇمسىقتىعا شوقىتتىرماي، بار بىلگەنىمىزدى ۇيرەتىپ، ءوسىرىپ جاتقان بالالارىمىزعا ءتىل تيگىزىپ قانا قويماي، ولاردىڭ اتا-انالارىنىڭ، ياعني ءبىزدىڭ بەرگەن تاربيەمىزدى جوققا شىعارماق بولعان سوزدەرى ءبىزدىڭ قولىمىزعا قالام الىپ، وسى اشىق حاتتى جولداۋعا ماجبۇرلەپ وتىر»، – دەپ باستايدى ءسوزىن دانيار ءقۇلىمشيننىڭ (Bala) اتا-اناسى.
بۇدان كەيىن، اشىنعان اتا-انا 91 توبى تۋرالى انەكدوت شىعارعان ساكەننىڭ بۇل ارەكەتىن زاڭسىزدىققا بالادى.
«ونەر جولى – اۋىر جول، ەرىككەننىڭ ەرمەگى ەمەس، تانىمالدىلىق تا وڭايلىقپەن كەلمەيدى. ول ءۇشىن تالانت، ەڭبەك، ەرىك-جىگەر قاجەت. وسىنىڭ ءبارىن بىلە تۇرا، ءبىر ونەرپاز ەكىنشىلەرىنە نەشە ءتۇرلى اتاۋ بەرىپ، قالا بەردى انەكدوت شىعارىپ، ونىسىن جاريا باسىلىمداردا جاريالاۋى – بىرىنشىدەن، جەكە ادامداردىڭ ار-نامىسىنا ءتىل تيگىزۋى، ياعني زاڭ بۇزۋشىلىق بولىپ ەسەپتەلىنەدى. ەكىنشىدەن، اتالمىش توپتىڭ تىڭدارماندارىمەن ساناسپاعاندىق، ولاردىڭ تالعامدارىن سىيلاماعاندىق دەپ بىلەمىز!
ناقتىلاپ ايتساق، 91 توبى تۋرالى جاعىمسىز، ءبىرجاقتى پىكىرلەر ايتىپ جۇرگەن ونەر ادامدارىنىڭ ىشىنەن، جاستايلارىنان كوز الدىمىزدا وسكەن، وزدەرى دە توپ قۇرعان، ونىڭ بارلىق «قىزىق-شىجىعىن» بىلەتىن ساكەن مايعازييەۆ، مەيرامبەك بەسبايەۆ ىنىلەرىمىزدىڭ قانداي باستاماعا جاناشىرلىق جاساماق بولىپ جۇرگەندەرىن تۇسىنە المادىق. الدە قازاق ەستراداسىنىڭ كوسەمدەرى بولعىسى كەلە مە نەمەسە ەستراداعا كەڭەس وداعىندا ورىن العان ساياسي سەنزۋرا ورناتۋعا باستاماشى بولعىسى كەلىپ ءجۇر مە؟! تۇپكى ماقساتتارى نە؟ توپتى تاراتۋ ما؟» – دەپ جالعايدى ءسوزىن ءاليا قادىروۆا مەن اقىلباي قۇلىمشين.
بۇدان كەيىن، حات اۆتورلارى مەيرامبەك بەسبايەۆتىڭ Ninety one تۋرالى پىكىرىنە توقتالادى.
«جارايدى، قاراپايىم تىڭدارمان ونەردىڭ كەي تۇستارىن تۇسىنبەي نەمەسە توپتىڭ مۋزىكاسىن، كيىم كيىستەرىن جاتسىنىپ، ءتۇرلى سوزدەر ايتىپ جاتسا، تۇسىنۋگە بولادى. تالعامعا تالاس جوق دەگەن. الايدا مادەنيەت قايراتكەرلەرىنىڭ كاسىبي سىن ەمەس، بىرەۋىنىڭ انەكدوت شىعارىپ، ەكىنشىسىنىڭ /مەيرامبەك بەسپايەۆتىڭ Zhuldyz.tv-عا بەرگەن بەينە سۇحباتىندا/ «…ونداي تانىمالدىلىقتىڭ كەرەگى جوق. 5 ادام بولسا، 2ء-ى ۇرعىسى كەپ جۇرەدى. بۇعىنىپ-تىعىلىپ جۇرگەن ول ونەر مە، اكەڭ؟» دەگەنىن قالاي تۇسىنۋگە بولادى؟ مەيرامبەك پەن ساكەن وسىلاي دەگەن دەپ، توپقا قارسى بولىپ جۇرگەندەردىڭ قارسىلىعىن ودان سايىن ءورشىتۋ مە ماقساتتارى؟
ءتىپتى، 91 (Ninety one) توبىنداعى بالالارىمىزدىڭ «تاربيەسى» جايلى ءسوز قوزعاپ، ءجون كورسەتۋگە، قالا بەردى، ءبىزدى، اتا-انالارىن ءسوز قىلۋعا ەشكىمنىڭ حاقىسى جوق. بالالارىمىز ونەرلەرىنە سۇيەنىپ، اندەرىن جازىپ، بيلەرىن بيلەپ، حالىقتىڭ الدىندا قالاي ەركەلەسە دە، قالاي جۇرسە دە ءوز ەرىكتەرى. كەزىندە سىزدەردىڭ اندەرىڭىزدى تىڭداپ، ونەرلەرىڭىزگە ءسۇيسىنىپ، قۇرمەتتەدىك، ماقتان ەتتىك. ەندى سىزدەردىڭ ءبىزدىڭ بالالارىمىزدىڭ باستامالارىنا قاباتتاسۋلارىڭىزعا جول بولسىن؟
91 توبى جاڭا زامانعا لايىقتالعان جانردا ونەر كورسەتىپ، الەمدىك پوپ مۋزىكا ىرعاقتارىنسىز جاڭا زامان تىنىسىن سەزىنە المايتىن وسكەلەڭ ۇرپاق، جاس بۋىننان تۇراتىن وزىندىك پۋبليكاسى بار توپ. ءبىزدىڭ بالالارىمىز، اۋەلى اللانىڭ اماناتىندا، ودان قالدى ءوزىمىزدىڭ باقىلاۋىمىزدا! ءدۇيىم قازاق جاستارىنىڭ تاربيەسى وسى بەس جىگىتتىڭ قولىندا ەمەس. بالانى تاربيەلەۋ – ساحناداعى بەس جىگىتتىڭ ەمەس، ۇيدەگى اتا-انانىڭ مىندەتى. ال كىمدە-كىم بالاسىن تاربيەلەي الماسا – كىنا وزىنەن. ونى ساحنا جۇلدىزدارىنان كورۋدىڭ تۇككە قاجەتى جوق. مۋزىكانت، ءانشى رەتىندە مۋزىكالىق جانرلارىن، جاساعان دۇنيەلەرىن: سينگل، البوم، پايىم، بەينەباياندارى جايلى سىن، كەم تۇستارىن ايتساڭىزدار ءوز ەرىكتەرىڭىز. ال، جەكە باسقا ءتيىسىپ، اتا-انالارىنىڭ بەرگەن تاربيەلەرىنە كۇمان كەلتىرۋ – شەكتەن شىققاندىق بولىپ تابىلادى. ءبىز ۇزاق ۋاقىت ۇندەمەي كەلدىك. سەبەبى، ءبىزدى ىشكى مادەنيەتىمىز سالعىلاسىپ، بەت جارتىسىپ جاتۋعا جىبەرمەدى. ءالى دە “قازاقشىلدىق” تانىتىپ وتىرعانىمىزدى قاپەرلەرىڭىزگە ۇستاعايسىزدار!
ءبىز بار بىلگەنىمىزدى بويىنا ءسىڭىرىپ، الاقانىمىزعا سالىپ وسىرگەن بالالارىمىز جايلى ايتىلىپ جاتقان عايبات سوزدەرگە قوسىلىپ، ءتىپتى، بەرگەن تاربيەمىزگە كۇمان كەلتىرىپ وتىرعان، ءوزىمىز ەستى دەپ ساناپ كەلگەن ساكەن مەن مەيرامبەك بولعانى قىنجىلتتى.
اينالايىندار، مەيرامبەك، ساكەن! ءبىزدىڭ ءجۇرىپ وتكەن جولىمىز سىزدەردىكىنەن ەداۋىر ۇزاق ءارى عۇمىرلى. ءبىز بويىنا قازاقى تاربيە مەن رۋح ۇيالاتىپ وسىرگەن بالالارىمىزعا سەنەمىز! بارىنە ۋاقىت تورەشى! اتام قازاق «بولار بالانىڭ بەلىن بۋ» دەگەن. ارتىق اڭگىمەنى قويىڭىزدار! سوزگە توقتايدى دەپ ۇمىتتەنەمىز.
وزدەرىڭ دە ءبىر ءسات جاستىق شاقتارىڭىزعا ورالىپ، 19 جاستا قانداي ءان تىڭداپ، قانداي كيىم كيىپ، قانداي بي بيلەگەندەرىڭدى ەسكە تۇسىرىڭىزدەرشى»، – دەيدى 91 توبىنىڭ مۇشەسى قۇلىمشين دانياردىڭ (Bala) اكە-شەشەسى، مادەنيەتتانۋشى قۇلىمشين اقىلباي مەن فيلولوگ-زاڭگەر قادىروۆا ءاليا.
