استانادا 16 قىركۇيەك پەن 1 قاراشا ارالىعىندا «ۋچاسكە» جەدەل الدىن الۋ ءىس-شاراسى ءوتىپ جاتىر، دەپ حابارلادى ەلوردا اكىمدىگىنىڭ رەسمي سايتى.
ءىس-شاراعا اۋدان اكىمدىكتەرى، قالالىق پوليسيا دەپارتامەنتىنىڭ يۋۆەنالدى پوليسيا ءبولىمى، ءبىلىم باسقارماسى جانە ەلوردا اكىمدىگىنىڭ ايەلدەر ىستەرى جانە دەموگرافيالىق ساياسات، كامەلەتكە تولماعاندار ىستەرى جانە ولاردىڭ قۇقىقتارىن قورعاۋ جونىندەگى كوميسسيا وكىلدەرى قاتىسۋدا.
ۋچاسكەلىك پوليسيا ينسپەكتورلارى وزدەرى قىزمەت كورسەتەتىن وبەكتىنىڭ كريمينوگەندىك جاعدايىن زەردەلەۋ ءۇشىن اۋلالاردى جانە پاتەرلەردى ارالايدى، ىشكى ىستەر ورگاندارىندا ەسەپتە تۇرعان ادامداردى ولارمەن پروفيلاكتيكالىق اڭگىمەلەسۋ جۇرگىزۋ ءۇشىن تەكسەرەدى.
سونىمەن قاتار قوعامعا جات ارەكەتتەردى الدىن الۋ ءۇشىن جالدامالى پاتەرلەر، بازارلار جانە باسقا دا ساۋدا ورىندارى، تۇرمىسى تومەن وتباسىلار، جاستار مەن كامەلەتكە تولماعاندار شوعىرلاناتىن جەرلەرگە، ناقتىراق ايتقاندا ورتالىق ساياباق، ساۋدا-ويىن ساۋىق ورتالىقتارى، كومپيۋتەر كلۋبتارى تەكسەرىلۋدە.
استانا اكىمدىگىنىڭ ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسياسىنىڭ حاتشىسى قارلىعاش ساركەنوۆانىڭ ايتۋىنشا، كامەلەتكە تولماعان بالالار اراسىنداعى قۇقىق بۇزۋشىلىقتاردىڭ الدىن الۋ جانە ولاردىڭ قۇقىقتارىن قورعاۋ ماسەلەلەرى كوميسسيانىڭ ەرەكشە باقىلاۋىندا.
«جەدەل الدىن الۋ ءىس-شاراسى استاناداعى قاۋىپسىزدىكتى قامتاماسىز ەتۋگە، جاسوسپىرىمدەر اراسىنداعى قىلمىس پەن قۇقىق بۇزۋشىلىقتى بولدىرماۋعا باعىتتالادى. جاسوسپىرىمدەردىڭ وزدەرىمەن پروفيلاكتيكالىق تۇرعىدا اڭگىمە جۇرگىزە وتىرىپ، ولاردى زاڭعا باعىنۋعا شاقىرامىز. بالالاردى قاراۋسىز قالدىرعان اتا-انالاردى دا انىقتاپ، قاجەت بولعان جاعدايدا ولار اكىمشىلىك جاۋاپكەرشىلىككە تارتىلادى»،- دەدى ق.ساركەنوۆا.
قۇقىق قورعاۋ جانە مەملەكەتتىك ورگاندار، استانا قالاسى اكىمدىگىنىڭ ايەلدەر مەن وتباسىلىق-دەموگرافيالىق ساياسات جونىندەگى كوميسسياسىنىڭ مۇشەلەرىمەن بىرلەسە وتىرىپ، تۇنگى ۋاقىتتا قالا كوشەلەرىندە جانە ويىن-ساۋىق ورىندارىندا كامەلەتكە تولماعانداردى انىقتاۋ بويىنشا رەيدتەر وتكىزەدى.
ەسكە سالساق، قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 442-بابىنا سايكەس، 22.00-دەن 6.00-گە دەيىن كامەلەتكە تولماعانداردىڭ زاڭدى وكىلدەرىنىڭ قاراۋىنسىز ويىن-ساۋىق ورىندارىنا بارۋىنا تىيىم سالىنعان، سونداي-اق 23.00-دەن 6.00-گە دەيىن كامەلەتكە تولماعانداردىڭ تۇرعىن ۇيدەن زاڭدى وكىلدەرىنىڭ ەرىك ءجۇرۋىنسىز شىعۋىنا تىيىم سالىنادى.
