سوڭعى جىلدارى الماتىدا ەلەكتروۆەلوسيپەدتەردىڭ سانى كۇرت ءوسىپ كەلەدى. مۇنداي كولىكتەردىڭ قولجەتىمدىلىگى، ەكولوگيالىق تازالىعى جانە قالا ىشىندە پايدالانۋ ىڭعايلىلىعى ولاردىڭ تانىمالدىلىعىن ارتتىرىپ وتىر،- دەپ حابارلايدى Dalanews.kz

الايدا مامانداردىڭ ايتۋىنشا، قازىرگى زاماناۋي ەلەكتروۆەلوسيپەدتەردىڭ كوپشىلىگى ساعاتىنا 40–45 شاقىرىمعا دەيىن جىلدامدىقپەن قوزعالىپ، 400 ۆت-تان جوعارى قۋاتقا يە. بۇل زاڭمەن بەلگىلەنگەن شەكتى كورسەتكىشتەردەن اسىپ تۇسەدى جانە ولاردى اۆتوماتتى تۇردە موپەد ساناتىنا جاتقىزادى.

زاڭعا سايكەس، قۋاتى 250 ۆت-تان جوعارى جانە جىلدامدىعى ساعاتىنا 25 شاقىرىمنان اساتىن كولىك قۇرالدارى مىندەتتى تۇردە تىركەۋگە جاتادى. ياعني ولاردىڭ تەحنيكالىق پاسپورتى، مەملەكەتتىك ءنومىرى مەن ساقتاندىرۋى بولۋى ءتيىس.

«ازاماتتاردىڭ ەلەكتروۆەلوسيپەدتەرگە دەگەن قىزىعۋشىلىعىن تۇسىنەمىز. ءبىراق زاڭ تالاپتارى بار. قۋاتى جوعارى ەلەكتروۆەلوسيپەدتەردى جالپى قولدانىستاعى جولداردا تىركەۋسىز جۇرگىزۋگە بولمايدى. بۇل ەڭ الدىمەن قاۋىپسىزدىك ماسەلەسى. سونىمەن قاتار تىركەۋ كولىك قۇرالىنىڭ مەنشىك قۇقىعىن راستايدى، ال ۇرلانعان نەمەسە جوعالعان جاعدايدا يەسىنە قايتارۋدى جەڭىلدەتەدى»، – دەدى الماتى قالاسى پد اكىمشىلىك پوليسيا باسقارماسىنىڭ باستىعى اسحات قۇلبايەۆ.

پوليسيا وكىلدەرىنىڭ مالىمەتىنشە، تىركەۋسىز جۇرەتىن ەلەكتروۆەلوسيپەدتەر جولداعى قوزعالىستى قيىنداتىپ، جول-كولىك وقيعالارىنىڭ كوبەيۋىنە سەبەپ بولۋى مۇمكىن.

وسىعان بايلانىستى ءتارتىپ ساقشىلارى قالا تۇرعىندارىن زاڭدى ساقتاۋعا جانە ەلەكتروۆەلوسيپەدتەردى ۋاقتىلى تىركەۋگە شاقىردى.