قوعام بەلسەندىسى سانجار بوقايەۆ الماتىداعى ۇلكەن الماتى وزەنىنىڭ بويىنان تابيعي گرانيت پليتالارىنىڭ زاڭسىز تاسىمالى ءجۇرىپ جاتقانىن اشكەرەلەدى، دەپ حابارلايدى Dalanews.kz.
تۇنگى باقىلاۋ
بوقايەۆتىڭ ايتۋىنشا، جەرگىلىكتى تۇرعىندار وزەن جاعاسىنان تۇسىرىلگەن بەينەجازبالاردى جىبەرىپ، تۇندە جۇك كولىكتەرىنە گرانيت پليتالارى تيەلىپ جاتقانىن حابارلاعان. وسىدان كەيىن ول ءتۇن ىشىندە وقيعا ورنىنا بارىپ، كۇدىكتى ارەكەتتەردى باقىلاعان.
"ءبىز كەلگەننەن كەيىن ءبىر مانيپۋلياتور جۇك كولىگىن كوردىك. ول پليتالاردى تيەپ الىپ كەتتى. ارتىنشا تاعى ءبىر كولىك كەلىپ توقتادى. ءبىز ازىرگە جاقىنداماي، قايدا اپاراتىنىن باقىلاپ كورۋدى ۇيعاردىق. ويتكەنى مۇنىڭ ءبارى پوليسيانىڭ كوز الدىندا بولىپ جاتىر"، – دەيدى سانجار بوقايەۆ.
بەلسەندى كولىكتىڭ ءتۇن ورتاسىندا عانا ءجۇرۋىن كۇدىكتى جاعداي دەپ باعالادى:
"ەگەر ءبارى زاڭدى بولسا، نەگە كۇندىز تاسىمايدى؟ نەگە تەك تۇندە جاسىرىن اپارادى؟" – دەپ سۇراق قويدى ول.
العاشىندا بوقايەۆ پليتالاردىڭ قالا اكىمدىگىنىڭ بازاسىنا جەتكىزىلۋى مۇمكىن ەكەنىن توپشىلاعان. ويتكەنى گرانيت پليتالارى اكىمدىكتىڭ مۇلكى بولىپ سانالادى.
الايدا كولىك قالا سىرتىنا بەت العان.
"ءبىز بەساعاش ارقىلى تالعار اۋدانىنا شىقتىق. اقىرى كولىكتىڭ جەكە مەنشىك ۇيگە قاراي بۇرىلعانىن كوردىك. بۇل مەنى شوشىتتى. ويتكەنى پليتالاردى اكىمدىك بازاسىنا ەمەس، مۇردە تاس قوياتىن سەحقا اپارىپ ءتۇسىردى. سوندا ولار اكىمدىك مۇلكىن ساتىپ جاتىر ما؟" – دەپ نارازىلىعىن ءبىلدىردى بوقايەۆ.
بوقايەۆ تاستاردى تاسىعان جۇمىسشىلاردىڭ بىرىمەن سويلەسكەن.
- تاستى قايدان الىپ كەلە جاتىرسىز؟
- ۇيدەن... قوقىس تاستايتىن جەردەن... ايتەيدەن
- مىنا جەرگە نە ءۇشىن الىپ كەلىپ جاتىرسىز؟
- بۇل سىنعان زاتتار عوي
- سىنباعان، ءبۇتىن عوي، دەيدى سانجار بوقايەۆ.
"ولاردى مۇردە تاسىن جاسايتىن سەحتارعا ساتىپ جاتىر. مۇنى ءتىپتى تۇسىندىرۋگە دە ءتىلىم بارمايدى، بىلەسىزدەر مە، سونشالىقتى جاعىمسىز تىرلىك"، - دەيدى سانجار.
قوعام بەلسەندىسى گرانيت تاستاردى قايتادان قالاعا اپارۋدى تالاپ ەتتى.
