الماتىدا قاتتى جاڭبىردان جول وپىرىلىپ، كولىكتەر بۇلىنگەن، دەپ حابارلايدى Dalanews.kz.
وقيعا اۋەزوۆ اۋدانىنداعى امانجول كوشەسىندە بولعان.
الماتى قالاسى اۋەزوۆ اۋدانى اكىمىنىڭ اپپاراتى ۇسىنعان دەرەكتەرگە سايكەس، «سپەسستروي گرۋپپ لتد» ج ش س مەردىگەر ۇيىمى امانجول كوشەسىندە سۋ جانە كارىز جۇيەلەرىن تارتۋ بويىنشا قۇرىلىس-مونتاج جۇمىستارىن ورىنداعان. بۇل جۇمىستار تاراتۋ جەلىلەرىن سالۋ جوباسى اياسىندا جۇرگىزىلىپ، تولىق كولەمدە اياقتالعان.
اسفالتبەتون جابىنىن قالپىنا كەلتىرۋ جۇمىستارى ۋاقىتشا كەيىنگە شەگەرىلگەن. بۇعان «QazaqGaz» اق تاپسىرىسى بويىنشا ديامەترى 300 مم (بولات) گاز قۇبىرىن سالۋ جوسپارلانعانى سەبەپ بولدى. مۇنداي شەشىم جول جابىندىسىن قايتا قازۋدان جانە تۇرعىندارعا قوسىمشا قولايسىزدىق تۋدىرۋدان ساقتانۋ ءۇشىن قابىلدانعان. جابىندى قالپىنا كەلتىرۋ جۇمىستارى گاز قۇبىرى توسەلىپ بىتكەننەن كەيىن جۇرگىزىلۋى جوسپارلانعان.
الايدا اۋداننىڭ بارلىق نوسەر سۋلارى قولدانىستاعى ارىق جۇيەسى ارقىلى وسى كوشەگە اعىپ كەلەتىندىكتەن، جول جابىندىسىنا تۇسەتىن جۇكتەمە ەداۋىر ارتقان. سونىمەن قاتار، 6 مەترگە دەيىنگى تەرەڭدىكتە جۇرگىزىلگەن ينجەنەرلىك جەلىلەر توپىراق نەگىزىن السىرەتكەن.
وسى جاعدايلار مەن قاتتى جاۋعان نوسەردىڭ سالدارىنان كوشەدە شوگۋ پايدا بولىپ، جول جابىندىسىنىڭ تۇتاستىعى بۇزىلدى. سونىڭ ناتيجەسىندە 2025 جىلدىڭ 16 قىركۇيەگىندە جولدىڭ وپىرىلۋىنان 13 اۆتوكولىككە زاقىم كەلدى.
قازىرگى ۋاقىتتا امانجول كوشەسى جابىق تۇر. ەرتەڭ تاڭەرتەڭنەن باستاپ كولىكتەردى ەۆاكۋاسيالاۋ، جەردى شىعارۋ جانە باللاست توسەۋ جۇمىستارى باستالادى. بۇل جۇمىستار كوشە تولىق تازارتىلعانعا دەيىن جالعاسادى.
سونىمەن بىرگە مەردىگەر ۇيىم زارداپ شەككەن كولىك يەلەرىنە كەلتىرىلگەن شىعىندى تولىق وتەۋگە مىندەتتەلدى.
