Almatyda qatty jańbyrdan jol opyrylyp, kólikter búlingen, dep habarlaidy Dalanews.kz.
Oqiǵa Áýezov aýdanyndaǵy Amanjol kóshesinde bolǵan.
Almaty qalasy Áýezov aýdany ákiminiń apparaty usynǵan derekterge sáikes, «Spetsstroi Grýpp LTD» JShS merdiger uiymy Amanjol kóshesinde sý jáne káriz júielerin tartý boiynsha qurylys-montaj jumystaryn oryndaǵan. Bul jumystar taratý jelilerin salý jobasy aiasynda júrgizilip, tolyq kólemde aiaqtalǵan.
Asfaltbeton jabynyn qalpyna keltirý jumystary ýaqytsha keiinge shegerilgen. Buǵan «QazaqGaz» AQ tapsyrysy boiynsha diametri 300 mm (bolat) gaz qubyryn salý josparlanǵany sebep boldy. Mundai sheshim jol jabyndysyn qaita qazýdan jáne turǵyndarǵa qosymsha qolaisyzdyq týdyrýdan saqtaný úshin qabyldanǵan. Jabyndy qalpyna keltirý jumystary gaz qubyry tóselip bitkennen keiin júrgizilýi josparlanǵan.
Alaida aýdannyń barlyq nóser sýlary qoldanystaǵy aryq júiesi arqyly osy kóshege aǵyp keletindikten, jol jabyndysyna túsetin júkteme edáýir artqan. Sonymen qatar, 6 metrge deiingi tereńdikte júrgizilgen injenerlik jeliler topyraq negizin álsiretken.
Osy jaǵdailar men qatty jaýǵan nóserdiń saldarynan kóshede shógý paida bolyp, jol jabyndysynyń tutastyǵy buzyldy. Sonyń nátijesinde 2025 jyldyń 16 qyrkúieginde joldyń opyrylýynan 13 avtokólikke zaqym keldi.
Qazirgi ýaqytta Amanjol kóshesi jabyq tur. Erteń tańerteńnen bastap kólikterdi evakýatsiialaý, jerdi shyǵarý jáne ballast tóseý jumystary bastalady. Bul jumystar kóshe tolyq tazartylǵanǵa deiin jalǵasady.
Sonymen birge merdiger uiym zardap shekken kólik ielerine keltirilgen shyǵyndy tolyq óteýge mindetteldi.
