ەلدەگى توتەنشە جاعدايعا بايلانىستى رەسپۋبليكامىزداعى ءار ءوڭىر پرەزيدەنت قاسىم-جومارت كەمەل ۇلىنىڭ تاپسىراماسىن بۇلجىتپاي ورىنداۋ ماقساتىندا ءتۇرلى شارالاردى ىسكە اسىرۋدا. وسى تۇرعىسىندا الماتى وبلىسى تىم بەلسەندى ەكەنىن اتاپ وتكەن ءجون.
كەنەتتەن كەلگەن ىندەت، تالايىمىزدى توسىرقاتقانى جاسىرىن ەمەس. «نە ىستەمەك كەرەك؟» دەپ ساسقان ەلدى سابىرعا شاقىرۋشى بيلىكتىڭ بىلىكتىلىگىن استىن سىزىپ اۋىز تولتىرىپ ايتۋعا تولىقتاي نەگىز بار.
جەر اسەمى جەتىسۋدىڭ باسشىلارى جاستار جانە ەرىكتىلەرمەن بىرىگىپ قارقىندى ەڭبەك ەتۋدە. بۇگىنگى تاڭدا وبلىس بويىنشا 17 اۋدان مەن 3 قالادا بارلىعى 520 قايىرىمدىلىق اكسيالارى وتكىزىلدى.
ونىڭ ىشىندە اۋدان، قالا كولەمىندە دەزينفەكسيالىق جۇمىستارعا اتسالىسۋ، ازىق-تۇلىك تاسىمالداۋ، مەديسينالىق انتيسەپتيك، جەكە گيگيەنالىق زاتتار جانە بەتپەردەمەن قامتاماسىز ەتۋمەن اينالىسۋدا.
«مەيىرىمدى جەتىسۋ» ەرىكتىلەردىڭ فرونت-كەڭسەسىندە تاۋلىك بويى الەۋمەتتىك جەلىلەردە حابارلاما، تەلەفون ارقىلى تۇرعىنداردىڭ سۇرانىسىن قابىلدايتىن جەلى جۇمىس جاسايدى. الەۋمەتتىك جەلى ارقىلى كومەك سۇراپ بايلانىسقاندار سانى – 117، قاۋىرت جەلىنىڭ كومەگىنە جۇگىنگەندەر – 78 ادام.
الەۋمەتتىك جاعدايى تومەن، از قامتىلعان جانە كوپبالالى وتباسىلار مەن جالعىزباستى انالارعا، جالپى 357 وتباسىنا الەۋمەتتىك كومەك كورسەتىلىپ، ازىق-تۇلىكپەن قامتاماسىز ەتىلدى.
وبلىستاعى 1300 ەرىكتىنىڭ اتسالىسۋىمەن 3000 ماسكا تىگىلىپ، تۇرعىندارعا تاراتىلدى.
ۇيدەن شىعىپ، ازىق-تۇلىك الۋعا مۇمكىندىگى جوق تۇرعىندارعا كومەك رەتىندە جەتكىزىپ بەرۋ قىزمەتىنە اۆتوەرىكتىلەر تارتىلعان.
بۇل باستاماسى عانا. حالىقتىڭ قامىن ويلاعان اتقامىنەرلەر ازىق-تۇلىك باعاسىنا دا ءمان بەرىپ، باعانى باقىلاۋىندا ۇستاپ وتىرعان جايى بار. وسىعان قاتىستى الماتى وبلىسى اكىمىنىڭ ورىنباسارى سەرىكجان بەسكەمپىروۆتىڭ توراعالىعىمەن ايماق اكىمدەرىنىڭ سەلەكتورلىق كەڭەسى ءوتتى.
وندا نارىقتاعى ماسەلەلەر تالقىلاندى. كەڭەس بارىسىندا اكىمدىكتەر "ازيا اگرو-فۋد" كومپانياسىمەن ۇن ءوندىرۋ بويىنشا ىنتىماقتاساتىنى جانە الماتى وبلىسىنىڭ تۇرعىندارى ءبىر كيلوگرامم ۇندى 130 تەڭگەدەن ساتىپ الۋ مۇمكىندىگىنە يە بولعانى انىقتالدى.
اتالعان ءونىمنىڭ ءبىر قابىن تەك ءبىر عانا جەكە تۇلعا الادى. مۇنداعى سەبەپ، الىپساتارلىقتان ساقتانۋ.
توتەنشە جاعادايدى ءوز پايداسىنا جاراتاتىن «پىسىقتار» دا تابىلاتىنىن ەسكەرگەن سەرىكجان بەسكەمپىروۆ جاۋاپتى تۇلعالارعا ازىق- تۇلىك تاۋارلارىنىڭ باعاسىن باقىلاۋدى تاپسىردى.
بۇگىندە بازاردا جانە دۇكەندەردە ەل قولدان جاساندى كەزەك جاساپ ءجۇر. ءدال قازىرگى ساتتە جەتى وزەنى توعىسقان مەكەندە الەۋمەتتىك ماڭىزى بار تاۋارلار جەتكىلىكتى مولشەردە دۇربەلەڭ تۋعىزۋدىڭ قاجەتى جوق.
باعانى نەگىزسىز ارتتىرۋ تۋرالى دەرەك تىركەلسە ءاربىر اكىم ءوزى جاۋاپ بەرەتىن بولادى ، سوندىقتان جۇمىس ىستەۋ كەرەك جانە جاعدايدى باقىلاۋ قاجەت.
احۋالدى باسشىلىققا الا وتىرىپ، اۋداندار ءبىر- بىرىمەن سەرىكتەستىك ورناتۋى ءتيىس.
مىسالى، رايىمبەك اۋدانىندا كارتوپ قورى، بالقاش تا - كۇرىش، قاراتال دا - پياز قورى بار ، - دەپ اتاپ ءوتتى وبلىس اكىمىنىڭ ورىنباسارى.
سەلەتورلىق جيىن ءوز ناتيجەسىن بەردى. بۇرىنعىداي ەمەس، بۇل وتىرىس الەۋمەتتىڭ الەۋەتىن ارتتىرۋعا ىقپال ەتتى. ەندى ەرتەڭ تاڭ سارىدەن تالدىقورعان قالاسىنىڭ تۇرعىندارى قاجەتتى تاعام ونىمدەرىن ءتيىمدى باعادا الا الادى. رەسمي اقپار بويىنشا، ناۋرىزدىڭ 23 جۇلدىزىندا جەتىسۋدىڭ باس شاھارىنداعى ارباتتا جانە كوممۋنالدىق بازاردا سۇيىق ماي، ۇن، كۇرىش، جەمىس-جيدەك، كوكونىس جانە ءسۇت ونىمدەرى جانە ت.ب. الەۋمەتتىك ماڭىزى بار تاۋارلار قول جەتىمدى باعادا ساتىلادى.
سونداي-اق، الماتى وبلىسىنىڭ تۇراقتاندىرۋ قورىنىڭ كەلەسى ونىمدەرى سورەلەردەن ورىن الادى:
ماسەلەن، سۇيىق مايدىڭ 0،875 ل – 355 تەڭگە، 4،4 ل – 1765 تەڭگەدەن، قانتتىڭ 50 كگ – 9 000 تەڭگەگە ساۋدالانسا، كۇرىشتىڭ 1 كگ – 225 تەڭگەگە الۋعا بولادى. جانە دە كەسپەنىڭ 1 كگ – 180 تەڭگە، كارتوپتىڭ 1 كگ – 80 تەڭگە، پيازدىڭ 1 كگ – 60 تەڭگەدەن ساتىلاتىن بولادى.
مىنە وسىلاي، توتەنشە جاعداي كەزىندە تۋرا شەشىم قابىلداندى. ەندىگىدە ەلدىڭ ەڭسەسى تىكتەلىپ، تۇرمىسى ءبىراز جاقسارماق. الداعى ۋاقىتتا الماتى وبلىسىندا مۇنداي يگى ىستەر جالعاسىن تاباتىن بولادى.
انار سابىروۆا
