مۇنداي جاعدايدا جاڭا ءبىلىم وشاعىنىڭ قابىرعاسىن قالاۋ اۋاداي قاجەت. بىلتىر اۋداندا 4 بىردەي جاڭا مەكتەپتىڭ قۇرىلىسى باستالعان. بۇعان 7 ملرد تەڭگەگە جۋىق قارجى بولىنگەن.
اۋدان باسشىلىعى وسى ارقىلى ءۇش اۋىسىمداعى مەكتەپ سانىن ازايتۋدى كوزدەۋدە. ايتالىق ىلەگە قاراستى تۇيمەبايەۆ اۋىلىنداعى №19 مەكتەپتە 1200 بالا قىسىلا-قىمتىرىلا ءبىلىم الۋدا. مەكتەپتىڭ ءوزى اۋەلدە 340 وقۋشىعا ارنالعان ەكەن.
اۋىلدا جىلىنا 90-100 بالاعا دەيىن مەكتەپ تابالدىرىعىن اتتايدى.
امالسىز ءۇش اۋىسىمدا وقىتاتىن مەكتەپتىڭ جانىنان ءازىر 300 ورىندىق نىسان سالىنىپ جاتىر.
مەكتەپ ديرەكتورى مارجان ەسەنبايەۆانىڭ ايتۋىنشا ىلە اۋدانىنا قونىس اۋدارۋشىلار كوپ. وسى سەبەپتى ءۇش اۋىسىمداعى مەكتەپ سانى دا ارتۋدا.
"مەكتەپكە جاپسارلاس ورنالاساتىن نىساننىڭ قۇرىلىسى اياقتالعاسىن ءۇش اۋىسىمدا وقىتۋ ماسەلەسى شەشىمىن تابادى. 1200-دەن اسا وقۋشىنى سىيعىزا الاتىن بولامىز. ونىڭ ۇستىنە ەسكى عيماراتتا اسحانا، سپورت جانە ءماجىلىس زالدارى جوق ەدى. ال جاڭا جوبادا مۇنىڭ ءبارى قامتىلعان"، – دەيدى ول.
مەكتەپكە جاپسارلاس ورنالاساتىن جاڭا عيمارات وسى وقۋ جىلىندا قولدانىسقا بەرىلەدى. قۇرىلىس باسىندا 80-گە تارتا جەرگىلىكتى تۇرعىن تەر توگىپ ءجۇر.
ىلەدەگى قۇرىلىس ءبولىمىنىڭ اعا مامانى ەرجان تۇرىسبايەۆتىڭ ايتۋىنشا قۇرىلىسى قىزۋ ءجۇرىپ جاتقان وزگە ءبىلىم وشاقتارى 2021 جىلدىڭ تامىز ايىندا تاپسىرىلادى.
ونىڭ ىشىندە قاراوي اۋىلىنداعى 900 ورىنعا ارنالعان مەكتەپ بار. وسىناۋ ءبىلىم ورداسى قولدانىسقا بەرىلگەسىن اۋىلداعى ءۇش اۋىسىمدا وقىتۋ ماسەلەسى شەشىلمەك. قۇرىلىس ورنالاسقان 80 ادامنىڭ ءبارى دە جەرگىلىكتى تۇرعىندار.
اۋداندىق ءبىلىم ءبولىمىنىڭ مالىمەتىندە ءازىر ىلەدە 48 بار. ونىڭ 15ء-ى ءۇش اۋىسىمدا وقىتادى.
"الداعى 2-3 جىلدىڭ كولەمىندە اۋداندا 10-عا تارتا مەكتەپ سالىنادى. ول ءوز كەزەگىندە ءۇش اۋىسىمدى وقىتۋدى جويۋعا وڭ اسەر ەتەدى"، - دەيدى ماماندار.
