الماتى وبلىسىندا سوڭعى 11 ايدا 23 مىڭعا جۋىق بالا دۇنيەگە كەلگەن، - دەپ حابارلايدى Dalanews.kz.
سونىڭ ىشىندە، الماتى وبلىسىنىڭ ورتالىعى قونايەۆ قالاسىندا 1000 استام نارەستە دۇنيە ەسىگىن اشقان. ەمدەۋ مەكەمەسىنىڭ پەرزەنتحاناسىنىڭ ەرەكشەلىگى - بوسانۋ بولمەلەرىنىڭ جەكە جوسپارلانۋى، ولاردىڭ ساپالى تۇردە بارلىق قاجەتتى قۇرال-جابدىقتارمەن قامتاماسىز ەتىلۋى: ىڭعايلى ترانسفورمەر توسەكتەرى، كارديومونيتور، بالانىڭ كيىمىن اۋىستىرعاندا جىلىتىلاتىن ۇستەلدەرى، وپەراسيالىق شامدار، ەلەكتروندى تارازىلار جانە ت.ب. سونىمەن قاتار، پەرزەنتحانادا تەك ءبىر رەتتىك جيىنتىقتار، كاتەتەرلەر، ينفۋزيالىق جۇيەلەر قولدانىلادى. پەرزەنتحانا جانە گينەكولوگيالىق بولىمشەلەردىڭ مەديسينالىق قۇرال-جابدىقتارمەن قامتىلۋى بۇگىندە 100 پايىزدى قۇراپ وتىر.
جاسالعان قولايلى جاعدايلاردى الدىعا تارتىپ، بىرنەشە كۇن بۇرىن العاشقى پەرزەنتىن قونايەۆ قالالىق كوپسالالى اۋرۋحاناسىنىڭ پەرزەنتحاناسىندا بوسانعان اينۇر ەسىمدى كەلىنشەكپەن سۇقباتتاستىق. جاس ايەلدىڭ سوزىنشە، بوسانۋ بولمەسىندە ول ءوزىن ىڭعايلى سەزىنگەن، ەركىن ۇستاي الاتىندىعىن تۇسىنگەن: بوسانۋعا دايىندالۋ كەزەڭىندە پالاتادا جۇرە العان، جاتا العان، تىزە-شىنتاق كۇيىن الا العان، سۇيىكتى اۋەنىن تىڭداي العان. سونىمەن قاتار، قالاۋىنشا، جەكە كيىمدەرىن، الىنبالى اياق كيىمدى، جەكە گيگيەنا قۇرالدارىن پايدالانۋعا مۇمكىندىگى بار ەكەندىگىن تۇسىنگەن.
ەلەۋسىزوۆا نازگۇل اسقار قىزى، ايەلدەر كەڭەسىنىڭ اكۋشەر-گينەكولوگ دارىگەرى: «ءبىزدىڭ پەرزەنتحانانىڭ دارىگەرلەرى تابيعي بوسانۋدى قولدايدى، سوندىقتان دارىگەر تەك بوسانۋ پروسەسىن باقىلايدى، ارالاسادى جانە تەك قاتاڭ مەديسينالىق سەبەپتەرمەن دارى-دارمەكتەردى قولدانادى. بوسانۋ كەزىندەگى كەز كەلگەن مانيپۋلياسيالار مەديسينالىق ارالاسۋ قاجەتتىلىگىن ەگجەي-تەگجەيلى ءتۇسىندىرىپ، بوسانعان ايەلدىڭ كەلىسىمىن العاننان كەيىن عانا جۇزەگە اسىرىلادى. بولىمشەدە دەنى ساۋ جۇكتى ايەلدەرگە عانا ەمەس، سونىمەن قاتار تاۋەكەل توبىنا جاتاتىن ناۋقاستارعا، پەريناتالدىق پروبلەمالارى بار ايەلدەرگە دە جوعارى بىلىكتى مەديسينالىق كومەك كورسەتىلەدى. سونداي-اق، كەسار تىلىگىنەن كەيىن جاتىرىندا تىرتىعى بار ايەلدەردى دە قىناپ ارقىلى بوسانۋدى تاجىريبەلەيدى. كەشەندى باعالاۋدان كەيىن، ونىڭ ىشىندە انامنەز دەرەكتەرى، الدىڭعى وپەراسياعا كورسەتكىشتەرىن ەگجەي-تەگجەيلى قاراستىرامىز. تابيعي تۇردە ايەلدىڭ ءوزى بوسانۋى مۇمكىندىگىن انىقتايمىز. بۇل مەديسينالىق ءىس-شارالاردى تەك تاجىريبەلى اكۋشەر-گينەكولوگتار جۇرگىزەدى. ديرەكتورىمىز، جوعارى ساناتتى اكۋشەر-گينەكولوگ راكيشيەۆا ايمان عالىمجان قىزى بۇل ءىس-شارانى جەكە باقىلاۋىندا ۇستايدى. وپەراسيالاردى اكۋشەر-گينەكولوگ، انەستەزيولوگ، نەوناتولوگتار توبى جاسايدى. انەستەزيا ءادىسىن بوسانۋ كەزىندەگى ايەلدىڭ، ۇرىقتىڭ جاعدايىن ەسكەرە وتىرىپ، انەستەزيولوگ جەكە انىقتايدى. وپەراسيا ءۇشىن انەستەزيا ءادىسىن تاڭداعاندا، ايەلدىڭ قالاۋى دا ەسكەرىلەدى».
11 ايدا الماتى وبلىسىندا 204 ەگىزدەر جانە ءبىر ۇشەم دۇنيە ەسىگىن اشقان.
