Almaty oblysynda sońǵy 11 aida 23 myńǵa jýyq bala dúniege kelgen, - dep habarlaidy Dalanews.kz.
Sonyń ishinde, Almaty oblysynyń ortalyǵy Qonaev qalasynda 1000 astam náreste dúnie esigin ashqan. Emdeý mekemesiniń perzenthanasynyń ereksheligi - bosaný bólmeleriniń jeke josparlanýy, olardyń sapaly túrde barlyq qajetti qural-jabdyqtarmen qamtamasyz etilýi: yńǵaily transformer tósekteri, kardiomonitor, balanyń kiimin aýystyrǵanda jylytylatyn ústelderi, operatsiialyq shamdar, elektrondy tarazylar jáne t.b. Sonymen qatar, perzenthanada tek bir rettik jiyntyqtar, kateterler, infýziialyq júieler qoldanylady. Perzenthana jáne ginekologiialyq bólimshelerdiń meditsinalyq qural-jabdyqtarmen qamtylýy búginde 100 paiyzdy qurap otyr.
Jasalǵan qolaily jaǵdailardy aldyǵa tartyp, birneshe kún buryn alǵashqy perzentin Qonaev qalalyq kópsalaly aýrýhanasynyń perzenthanasynda bosanǵan Ainur esimdi kelinshekpen suqbattastyq. Jas áieldiń sózinshe, bosaný bólmesinde ol ózin yńǵaily sezingen, erkin ustai alatyndyǵyn túsingen: bosanýǵa daiyndalý kezeńinde palatada júre alǵan, jata alǵan, tize-shyntaq kúiin ala alǵan, súiikti áýenin tyńdai alǵan. Sonymen qatar, qalaýynsha, jeke kiimderin, alynbaly aiaq kiimdi, jeke gigiena quraldaryn paidalanýǵa múmkindigi bar ekendigin túsingen.
Eleýsizova Nazgúl Asqarqyzy, áielder keńesiniń akýsher-ginekolog dárigeri: «Bizdiń perzenthananyń dárigerleri tabiǵi bosanýdy qoldaidy, sondyqtan dáriger tek bosaný protsesin baqylaidy, aralasady jáne tek qatań meditsinalyq sebeptermen dári-dármekterdi qoldanady. Bosaný kezindegi kez kelgen manipýliatsiialar meditsinalyq aralasý qajettiligin egjei-tegjeili túsindirip, bosanǵan áieldiń kelisimin alǵannan keiin ǵana júzege asyrylady. Bólimshede deni saý júkti áielderge ǵana emes, sonymen qatar táýekel tobyna jatatyn naýqastarǵa, perinataldyq problemalary bar áielderge de joǵary bilikti meditsinalyq kómek kórsetiledi. Sondai-aq, kesar tiliginen keiin jatyrynda tyrtyǵy bar áielderdi de qynap arqyly bosanýdy tájiribeleidi. Keshendi baǵalaýdan keiin, onyń ishinde anamnez derekteri, aldyńǵy operatsiiaǵa kórsetkishterin egjei-tegjeili qarastyramyz. Tabiǵi túrde áieldiń ózi bosanýy múmkindigin anyqtaimyz. Bul meditsinalyq is-sharalardy tek tájiribeli akýsher-ginekologtar júrgizedi. Direktorymyz, joǵary sanatty akýsher-ginekolog Rakisheva Aiman Ǵalymjanqyzy bul is-sharany jeke baqylaýynda ustaidy. Operatsiialardy akýsher-ginekolog, anesteziolog, neonatologtar toby jasaidy. Anesteziia ádisin bosaný kezindegi áieldiń, uryqtyń jaǵdaiyn eskere otyryp, anesteziolog jeke anyqtaidy. Operatsiia úshin anesteziia ádisin tańdaǵanda, áieldiń qalaýy da eskeriledi».
11 aida Almaty oblysynda 204 egizder jáne bir úshem dúnie esigin ashqan.
