بايقاۋدىڭ ماقساتى – مەملەكەتتىك ءتىل ساياساتىن ودان ءارى جەتىلدىرۋ جونىندەگى جۇمىستاردى جۇزەگە اسىرۋ جانە مەملەكەتتىك ورگاندارداعى مەملەكەتتىك ءتىل ساياساتىن جۇرگىزۋدەگى وزىندىك ۇلەسىن ايقىنداۋ.
بايقاۋعا، اۋدان، قالا اكىمدىكتەرىندە قىزمەت ىستەيتىن مەملەكەتتىك قىزمەتشىلەردەن قۇرالعان 15 توپ قاتىستى.
جارىسقا قاتىسۋشىلاردى الماتى وبلىسىنىڭ تىلدەردى دامىتۋ جونىندەگى باسقارما باسشىسىنىڭ مىندەتىن اتقارۋشى گۇلنار بىتەبەكوۆا قۇتتىقتادى.
– ق ر پرەزيدەنتى نۇرسۇلتان ءابىش ۇلى نازاربايەۆ «قازاقستان جولى-2050: ءبىر ماقسات، ءبىر مۇددە، ءبىر بولاشاق» اتتى جولداۋىندا «ماڭگىلىك ەل» يدەياسىن جاريالادى. «ماڭگىلىك ەل» قازاق ءتىلىنىڭ دامۋىمەن ءبىرتۇتاس ەكەنىن ەرەكشە اتاپ ءوتتى. ەلباسىنىڭ ءوز جولداۋىندا مەملەكەتتىك ءتىل تۋرالى: «ەندى ەشكىم وزگەرتە المايتىن ءبىر اقيقات بار. انا ءتىلىمىز ماڭگىلىك ەلىمىزبەن بىرگە ماڭگىلىك ءتىل بولدى. ونى داۋدىڭ تاقىرىبى ەمەس، ۇلتتىڭ ۇيىتقىسى ەتە بىلگەنىمىز ءجون» دەپ ايتقان ءسوزى ءاربىر ادامعا جاۋاپكەرشىلىك جۇكتەيدى، – دەگەن گۇلنار ايدار قىزى انا ءتىلىمىز رۋحاني ءتۇپ تامىرىمىز ەكەندىگىن، ەلدىكتىڭ نەگىزگى شارتى ۇلت رۋحىنىڭ وسۋىمەن، مەملەكەتتىك ءتىلدىڭ دامۋ بيىگىمەن ولشەنەتىنىن، وسى ورايدا جەتىسۋ جەرىندە اتقارىلىپ جاتقان جۇمىستاردىڭ از ەمەستىگىن، جىل ساناپ مەملەكەتتىك تىلگە قاتىستى اتقارىلىپ جاتقان شارالار مەن وعان ءبولىنىپ جاتقان قارجى كولەمى دە ۇلعايىپ كەلەتىنىن تىلگە تيەك ەتتى.
ءوز سوزىندە ول 2005-2006 جىلدارمەن سالىستىرعاندا مەملەكەتتىك تىلدە ىس-جۇرگىزۋ 46 پايىزدان 99، 3 پايىزعا جەتكەندىگىن، مەملەكەتتىك ءتىلدى ءبىلۋ – مەملەكەتتىك قىزمەتشىلەردىڭ ەڭ باستى بىلىكتىلىك تالابىنا اينالعانىن ايتتى. سونداي-اق، بايقاۋعا قاتىسۋشى توپتارعا ساتتىلىك تىلەدى.
![](/uploads/images/20240128014930786.jpg)
بايقاۋعا قاتىسۋشىلار ءتورت تاپسىرما بويىنشا سىنعا ءتۇستى. العاشقى كەزەڭدە سايىسكەرلەر وزدەرىن ولەڭ-جىرمەن، قارا سوزبەن جان-جاقتى تانىستىردى. ەكىنشى كەزەڭدە ءار كوماندا لەد-ەكراننان كورسەتىلگەن جەر-سۋلاردىڭ اتاۋلارىن انىقتاپ، قىسقاشا تاريحىنان سىر شەرتتى. ءۇشىنشى اينالىمدا توپ مۇشەلەرى مەملەكەتتىك ءتىل تۋرالى باستالعان قاناتتى سوزدەردى جالعاستىرىپ، تىلدەردى دامىتۋ سالاسىن رەتتەيتىن نورماتيۆتىك قۇقىقتىق اكتىلەر تۋرالى سۇراقتارعا جاۋاپ بەردى. سوڭعى اينالىمدا «ماڭگىلىك ەل – مارتەبەلى ءتىل» تاقىرىبىندا مۋزىكالىق جانە تەاترلاندىرىلعان قويىلىمدار كورسەتتى.
بايقاۋدىڭ ساراپشىلارى ۇمىتكەرلەر ونەرىن باعالاۋ كەزىندە ءتىل شەبەرلىگىنە، ءسوز ونەرىنە، كيىم كيۋ ۇلگىسىنە، ساحنادا ءوزىن-وزى ۇستاۋى سىندى باستى بەلگىلەرگە باسا نازار اۋداردى. قازىلار القاسىنىڭ شەشىمىمەن بايقۋدىڭ باس جۇلدەسى بارلىق سىننان سۇرىنبەي وتكەن تالدىقورعان قالاسى اكىمدىگىنىڭ «ەكسپو» كومانداسىنا بەرىلدى. ءبىرىنشى ورىن اقىندار مەن باتىرلار ەلىنەن كەلگەن «جامبىل جۇلدىزدارى» توبىنا تابىس ەتىلدى. ەكىنشى ورىن ەكى توپقا بۇيىردى. اتاپ ايتساق، «الاكول قىراندارى» (الاكول اۋدانى) توبى مەن پانفيلوۆ اۋدانىنان قاتىسقان «الداسپان» توبى. جۇلدەلى ءۇشىنشى ورىن ءۇش اۋدانعا بۇيىردى. «الاتاۋ» توبى (تالعار اۋدانى)، قاراتال اۋدانىنان «جالىن» توبى جانە «تالشىن» توبى (سارقان اۋدانى). سونىمەن قاتار بايقاۋدىڭ ارنايى نوميناسياسى ەڭبەكشىقازاق اۋدانىنىڭ نامىسىن قورعاعان «رۋحانيات» توبىنا تابىستالسا، ىنتالاندىرۋ سىيلىعىن «ءتىلدارىن» (كوكسۋ اۋدانى) توبى يلەندى. بارلىق جەڭىمپازعا اقشالاي سىيلىق پەن ارنايى ديپلوم تابىس ەتىلدى. بايقاۋدا جەڭىمپاز اتانعان «ەكسپو» توبى الداعى ۋاقىتتا وتەتىن رەسپۋبليكالىق سايىستا الماتى وبلىسىنىڭ نامىسىن قورعايتىن بولادى.