پوليسيا دەپارتامەنتى الماتى وبلىسىندا قاباعان ءيتتى توقتاتقان تۇرعىن جاۋاپقا تارتىلمايتىنىن مالىمدەدى، دەپ حابارلايدى Dalanews.kz.
دەپارتامەنت مالىمەتىنشە، جەلىدە تاراپ جاتقان «قاباعان ءيتتىڭ شابۋىلىن توقتاتقان تۇرعىندى جاۋاپقا تارتادى» دەگەن اقپارات شىندىققا جاناسپايدى. اتالعان ازاماتقا قاتىستى پروسەسسۋالدىق شەشىمدەر قابىلدانباعان.
"ق ر قىلمىستىق كودەكسىنىڭ 32-بابىنا سايكەس («قاجەتتى قورعانىس») ونىڭ ارەكەتى ءوزىن-وزى قورعاۋ ماقساتىنداعى زاڭدى ارەكەتكە جاتادى. زاڭعا سايكەس ومىرگە، دەنساۋلىققا نەمەسە مۇلىككە ناقتى ءقاۋىپ توندىرەتىن شابۋىلدى تويتارۋ كەزىندە قاجەتتى قورعانىس جاعدايىندا زيان كەلتىرۋ قىلمىستىق قۇقىق بۇزۋشىلىق بولىپ تابىلمايدى"، - دەيدى پوليسەيلەر.
سوندىقتان، كامەلەتكە تولماعان بالانى قاباعان يتتەردىڭ شابۋىلىنان قۇتقارعان ازاماتتىڭ ارەكەتى قولدانىستاعى زاڭناما نورمالارىن بۇزبايدى جانە قۇقىقتىق زارداپتارعا اكەپ سوقپايدى.
"بۇل رەتتە، سوتقا دەيىنگى تەرگەۋ اياسىندا ءيتتىڭ يەسىنىڭ ارەكەتى جان-جاقتى زەرتتەلىپ، ولارعا ءتيىستى قۇقىقتىق باعا بەرىلەدى. قانداي دا ءبىر زاڭ بۇزۋشىلىق بەلگىلەرى انىقتالسا، ول زاڭدا بەلگىلەنگەن تارتىپپەن جاۋاپكەرشىلىككە تارتىلادى"، - دەيدى پوليسيا دەپارتامەنتى.
ەسكە سالايىق، الماتى وبلىسى قاراساي اۋدانىندا بالانى قاباعان يتتەن قۇتقارىپ قالعان زەينەتكەردەن يت يەلەرى وتەماقى تالاپ ەتكەن بولاتىن. وقيعا 30 مامىردا بولعان. وقيعانىڭ باستى كۋاگەرى ءارى بالانى قۇتقارىپ قالعان اۋىل تۇرعىنى، زەينەتكەر سەرىكبەك ساقايبەكوۆتىڭ ايتۋىنشا، سول كۇنى كولىگىمەن جولاۋشى ايەلدى ۇيىنە جەتكىزىپ بارا جاتقاندا، ءبىر توپ بالانىڭ شۋلاپ، جان-جاققا قاشا جونەلگەنىن كورگەن.
ءقازىر 10 جاسار بالا قاراساي اۋداندىق ورتالىق اۋرۋحاناسىندا اۋىر جاراقاتپەن ەم الىپ جاتىر. بالانىڭ اناسى ەكاتەرينا بۋرميستروۆانىڭ ايتۋىنشا، ۇلىنىڭ جاعدايى وتە قيىن.
سەرىكبەك ساقايبەكوۆتىڭ ەرلىگى تۇرعىندار اراسىندا قىزۋ تالقىلانىپ، كوپشىلىكتىڭ قولداۋىنا يە بولدى. الايدا ولگەن يتتەردىڭ يەلەرى زەينەتكەردەن وتەماقى تالاپ ەتىپ وتىر ەكەن.
ارتىنشا ءىستى پروكۋراتۋرا باقىلاۋىنا الدى.
