Politsiia departamenti Almaty oblysynda qabaǵan itti toqtatqan turǵyn jaýapqa tartylmaitynyn málimdedi, dep habarlaidy Dalanews.kz.
Departament málimetinshe, jelide tarap jatqan «qabaǵan ittiń shabýylyn toqtatqan turǵyndy jaýapqa tartady» degen aqparat shyndyqqa janaspaidy. Atalǵan azamatqa qatysty protsessýaldyq sheshimder qabyldanbaǵan.
"QR Qylmystyq kodeksiniń 32-babyna sáikes («Qajetti qorǵanys») onyń áreketi ózin-ózi qorǵaý maqsatyndaǵy zańdy áreketke jatady. Zańǵa sáikes ómirge, densaýlyqqa nemese múlikke naqty qaýip tóndiretin shabýyldy toitarý kezinde qajetti qorǵanys jaǵdaiynda ziian keltirý qylmystyq quqyq buzýshylyq bolyp tabylmaidy", - deidi politseiler.
Sondyqtan, kámeletke tolmaǵan balany qabaǵan itterdiń shabýylynan qutqarǵan azamattyń áreketi qoldanystaǵy zańnama normalaryn buzbaidy jáne quqyqtyq zardaptarǵa ákep soqpaidy.
"Bul rette, sotqa deiingi tergeý aiasynda ittiń iesiniń áreketi jan-jaqty zerttelip, olarǵa tiisti quqyqtyq baǵa beriledi. Qandai da bir zań buzýshylyq belgileri anyqtalsa, ol zańda belgilengen tártippen jaýapkershilikke tartylady", - deidi politsiia departamenti.
Eske salaiyq, Almaty oblysy Qarasai aýdanynda balany qabaǵan itten qutqaryp qalǵan zeinetkerden it ieleri ótemaqy talap etken bolatyn. Oqiǵa 30 mamyrda bolǵan. Oqiǵanyń basty kýágeri ári balany qutqaryp qalǵan aýyl turǵyny, zeinetker Serikbek Saqaibekovtyń aitýynsha, sol kúni kóligimen jolaýshy áieldi úiine jetkizip bara jatqanda, bir top balanyń shýlap, jan-jaqqa qasha jónelgenin kórgen.
Qazir 10 jasar bala Qarasai aýdandyq ortalyq aýrýhanasynda aýyr jaraqatpen em alyp jatyr. Balanyń anasy Ekaterina Býrmistrovanyń aitýynsha, ulynyń jaǵdaiy óte qiyn.
Serikbek Saqaibekovtiń erligi turǵyndar arasynda qyzý talqylanyp, kópshiliktiń qoldaýyna ie boldy. Alaida ólgen itterdiń ieleri zeinetkerden ótemaqy talap etip otyr eken.
Artynsha isti prokýratýra baqylaýyna aldy.
