2025 جىلعى 7–11 ءساۋىر ارالىعىندا ستراسبۋرگ قالاسىندا ەۋروپا كەڭەسى پارلامەنتتىك اسسامبلەياسىنىڭ (پاسە) كەزەكتى سەسسياسى ءوتىپ جاتىر. اتالعان ءىس-شاراعا الماتى وبلىسىنان ارنايى كەلگەن دەلەگاسيا قاتىسۋدا. دەلەگاسيا قۇرامىندا قازاقستان حالقى اسسامبلەياسىنىڭ التى وكىلى بار، دەپ حابارلايدى Dalanews.kz
سەسسيا اياسىندا الماتى وبلىسىنىڭ دەلەگاسياسى ەۋروپا كەڭەسىنىڭ شتاب-پاتەرىندە «قازاق بۇرىشى» اتتى مادەني الاڭ ۇيىمداستىردى. بۇل باستاما – الماتى وبلىسى اكىمدىگى مەن فرانسيانىڭ ەلزاس وڭىرىندەگى ەۋروپالىق قاۋىمداستىق اراسىنداعى ءوزارا ىنتىماقتاستىق جونىندەگى مەموراندۋم اياسىندا جۇزەگە اسىرىلىپ جاتقان ناقتى جوبالاردىڭ ءبىرى. ايتا كەتۋ كەرەك، بۇل مەموراندۋم قازاقستان رەسپۋبليكاسىنىڭ پرەزيدەنتى 2024 جىلى پاريجگە جاساعان مەملەكەتتىك ساپارى قارساڭىندا قول قويىلعان بولاتىن.
«قازاق بۇرىشىندا» قازاقستاننىڭ مادەنيەتى مەن داستۇرلەرىن تانىستىراتىن بىرەگەي كورمە ۇسىنىلدى. قوناقتاردىڭ نازارىنا فوتو جانە بەينەماتەريالدار، كىتاپتار مەن اقپاراتتىق بروشيۋرالار، ۇلتتىق ناقىشتاعى قولونەر بۇيىمدارى، سونداي-اق قازاق حالقىنىڭ ءداستۇرلى كيىمدەرى مەن ۇلتتىق تاعامدارى ۇسىنىلدى. بۇل مادەني الاڭ ەلىمىزدىڭ باي مادەني مۇراسىن، فولكلورىن جانە تۋريستىك الەۋەتىن كەڭىنەن ناسيحاتتاۋعا باعىتتالعان.
سەسسيا بارىسىندا قازاقستان حالقى اسسامبلەياسىنىڭ 30 جىلدىق مەرەيتويى دا ەرەكشە اتاپ ءوتىلدى. بۇل بىرەگەي ينستيتۋت ەلدەگى ەتنوسارالىق كەلىسىمدى نىعايتۋدا جانە ازاماتتاردىڭ قۇقىقتارى مەن بوستاندىقتارىن قامتاماسىز ەتۋدە ماڭىزدى ءرول اتقارىپ كەلەدى.
– ستراسبۋرگ قالاسىندا ەۋروپا كەڭەسى پارلامەنتتىك اسسامبلەياسىنىڭ سەسسياسى اياسىندا ۇلتتىق مادەنيەتىمىزدى تانىستىرۋ ماقساتىندا «قازاق بۇرىشىن» ۇيىمداستىردىق. قازاقستان حالقى اسسامبلەياسىنىڭ اتىنان ەۋروپا جۇرتشىلىعىنا حالقىمىزدىڭ تاعامدارىن، فولكلورىن، قولدانبالى ونەر تۋىندىلارىن جانە ۇلتتىق سالت-داستۇرلەرىمىزدى تانىستىرىپ جاتىرمىز، – دەپ اتاپ ءوتتى الماتى وبلىسى «قوعامدىق كەلىسىم جانە دامۋ ورتالىعى» كمم باسشىسى ەلبوسىن اباي.
ءىس-شارا اياسىندا دومبىراشى ە. دۇكەننىڭ ورىنداۋىنداعى قازاقتىڭ حالىق كۇيى «كوروعلى» ەۋروپالىق قوناقتار مەن قازاق دياسپوراسى وكىلدەرىنىڭ ەرەكشە ىقىلاسىنا بولەنىپ، ۇلتتىق ونەرگە دەگەن قىزىعۋشىلىقتى ارتتىردى.
