2025 jylǵy 7–11 sáýir aralyǵynda Strasbýrg qalasynda Eýropa Keńesi Parlamenttik Assambleiasynyń (PASE) kezekti sessiiasy ótip jatyr. Atalǵan is-sharaǵa Almaty oblysynan arnaiy kelgen delegatsiia qatysýda. Delegatsiia quramynda Qazaqstan halqy Assambleiasynyń alty ókili bar, dep habarlaidy Dalanews.kz
Sessiia aiasynda Almaty oblysynyń delegatsiiasy Eýropa Keńesiniń shtab-páterinde «Qazaq buryshy» atty mádeni alań uiymdastyrdy. Bul bastama – Almaty oblysy ákimdigi men Frantsiianyń Elzas óńirindegi Eýropalyq qaýymdastyq arasyndaǵy ózara yntymaqtastyq jónindegi memorandým aiasynda júzege asyrylyp jatqan naqty jobalardyń biri. Aita ketý kerek, bul memorandým Qazaqstan Respýblikasynyń Prezidenti 2024 jyly Parijge jasaǵan memlekettik sapary qarsańynda qol qoiylǵan bolatyn.
«Qazaq buryshynda» Qazaqstannyń mádenieti men dástúrlerin tanystyratyn biregei kórme usynyldy. Qonaqtardyń nazaryna foto jáne beinematerialdar, kitaptar men aqparattyq broshiýralar, ulttyq naqyshtaǵy qolóner buiymdary, sondai-aq qazaq halqynyń dástúrli kiimderi men ulttyq taǵamdary usynyldy. Bul mádeni alań elimizdiń bai mádeni murasyn, folkloryn jáne týristik áleýetin keńinen nasihattaýǵa baǵyttalǵan.
Sessiia barysynda Qazaqstan halqy Assambleiasynyń 30 jyldyq mereitoiy da erekshe atap ótildi. Bul biregei institýt eldegi etnosaralyq kelisimdi nyǵaitýda jáne azamattardyń quqyqtary men bostandyqtaryn qamtamasyz etýde mańyzdy ról atqaryp keledi.
– Strasbýrg qalasynda Eýropa Keńesi Parlamenttik Assambleiasynyń sessiiasy aiasynda ulttyq mádenietimizdi tanystyrý maqsatynda «Qazaq buryshyn» uiymdastyrdyq. Qazaqstan halqy Assambleiasynyń atynan Eýropa jurtshylyǵyna halqymyzdyń taǵamdaryn, folkloryn, qoldanbaly óner týyndylaryn jáne ulttyq salt-dástúrlerimizdi tanystyryp jatyrmyz, – dep atap ótti Almaty oblysy «Qoǵamdyq kelisim jáne damý ortalyǵy» KMM basshysy Elbosyn Abai.
Is-shara aiasynda dombyrashy E. Dúkenniń oryndaýyndaǵy qazaqtyń halyq kúii «Kóroǵly» eýropalyq qonaqtar men qazaq diasporasy ókilderiniń erekshe yqylasyna bólenip, ulttyq ónerge degen qyzyǵýshylyqty arttyrdy.
