عىلىمي زەرتتەۋ «رۋحاني جاڭعىرۋ» باعدارلاماسى اياسىندا «شىعىس قازاقستاننىڭ ءىنجۋ-مارجانى» جوباسىن ىسكە اسىرۋ بويىنشا قولعا الىنعان. بۇگىندە زەرتتەۋ جۇمىستارىنىڭ ءبىرىنشى كەزەڭى اياقتالىپ وتىر.
– ايماقتاعى ءتۋريزمدى دامىتۋ ماسەلەسىنە ءاتۇستى قاراۋعا بولمايدى. بارلىعىنا عىلىمي دالەل قاجەت. سوندىقتان وبلىستاعى كولدەر مەن قاينارلاردىڭ قۇرامىن زەرتتەۋگە عالىمداردى قاتىستىرىپ وتىرمىز. مىسالى، الاكولدىڭ شيپاسى جايلى ەل-جۇرت بۇرىننان بىلەدى، تۋريستەردىڭ كوپتەپ اعىلۋى دا سوڭدىقتان. الايدا سۋ قۇرامىندا رادون كورسەتكىشى جوعارى ەكەنىن تەرەڭ زەرتتەۋ ناتيجەسىندە انىقتاپ وتىرمىز. بۇرىن رادون تەك راحمان قاينارلارىندا عانا بار دەپ ەسەپتەلەتىن، – دەدى شىعىس قازاقستان وبلىستىق تۋريزم جانە سىرتقى بايلانىستار باسقارماسىنىڭ باسشىسى جاسۇلان سارسەبايەۆ.
د. سەرىكبايەۆ اتىنداعى ءشقمتۋ-نىڭ عىلىمي جۇمىس جانە ينننوۆاسيالار جونىندەگى پرورەكتورى ولەگ گاۆريلەنكونىڭ ايتۋىنشا، زەرتتەۋدىڭ ءبىرىنشى كەزەڭىندە الاكول، زايسان، مارقاكول، سىبە كولدەرى، شىبىندىكول، دۋبىعالى (وكۋنكي)، راحمان قاينارلارى، «بارلىق-اراسان» جانە قوڭىر اۋليە بۇلاعى مەن قاسيەتتى بۇلاقتىڭ سۋ قۇرامى مەن باتپاعىنان ۇلگىلەر الىنعان.
ايتا كەتۋ كەرەك، ەلىمىزدە بالنەولوگيالىق قورتىندى جاسايتىن ينستيتۋت بولماعاندىقتان زەرتتەۋگە رەسەيلىك ماماندار دا تارتىلدى. رەسەي فەدەراسياسىنىڭ تومسك قالاسىنىڭ كۋرورتولوگيا جانە فيزيوتەراپيا عىلىمي-زەرتتەۋ ينستيتۋتى بەسقاراعاي اۋدانىنداعى شوشقالى كولى سۋىنىڭ مينەرالدانۋ جانە نەگىزگى يوندىق-تۇزدىق قۇرامى 30% ارتىق ەكەنىن دە دالەلدەپ وتىر.
2018 جىلى، ياعني زەرتتەۋ كەزەڭىنىڭ ەكىنشى كەزەڭىندە شىعىس قازاقستانداعى تاعى 4 كولدىڭ سۋى مەن ەمدىك باتپاعى قۇرامىنىڭ فيزيكا-حيميالىق قاسيەتتەرى تەكسەرىلىپ، تابيعي مينەرالدى سۋلاردى پايدالانۋ ءۇشىن بالنەولوگيالىق قورىتىندى جاساۋ جوسپارلانىپ وتىر.
