«رۋحاني جاڭعىرۋ» باعدارلاماسى اياسىندا ۇيىمداستىرىلىپ وتىرعان بايقاۋعا قاتىساتىن ەڭبەكتەردى سارالاۋ ءۇشىن بايقاۋ كوميسسياسى قۇرىلعان. كوميسسياعا شقو اكىمىنىڭ ورىنباسارىنىڭ ءتوراعالىق ەتۋىمەن ساۋلەت، قالا قۇرىلىسى، تۋريزم، جەرقاتىناستارى، كاسىپكەرلىك، تابيعي رەسسۋرستاردى پايدالانۋ، الەۋمەتتىك جوبالاردى ۇيلەستىرۋ، قارجى، ەكونوميكا، ىشكى ساياسات جانە قوعامدىق بىرلەستىكتەردەن ماماندار كىرگەن. جۇمىس توبى جوبالار مەن ۇسىنىستاردىڭ ىشىنەن ۇزدىگىن تاڭدايتىن بولادى. ال بايقاۋ ەرەجەلەرىن ءۇرجار اۋدانى اكىمدىگى ازىرلەيدى.
– كونكۋرس اشىق بولادى. وعان ساۋلەتتىك جوبالاردى ازىرلەۋگە ەڭبەك جانە ماتەريالدىق رەسۋرستارى جەتەتىن جوبالىق مەكەمەلەر مەن ساۋلەتشىلەر قاتىسا الادى. قاتىسۋشىلار سانىنا شەكتەۋ جوق. بايقاۋعا قاتىسۋ ءۇشىن قاتىسۋشىدان نەمەسە ۇيىم اتىنان ءوتىنىم مەن ساۋلەتتىك جوبا قاجەت، – دەدى باسپا ءسوز ماسليحاتىندا ءۇرجار اۋدانى اكىمىنىڭ ورىنباسارى ديدار حاميتوۆ.
ارت-جوبا بايگەسىندە گەودەزيا، قولايلى دەمالىسقا قاجەتتى ينفراقۇرىلىم جۇرگىزۋ، ەستەتيكالىق سىرقى كورىنىس سياقتى باسىمدىلىقتارعا اسا ءمان بەرىلمەك.
– ەگەر سىزدە جوباعا قاتىستى جاقسى يدەياڭىز بولسا، تۋريزمنىڭ دامۋىنا سۇبەلى ۇلەس قوسقىڭىز كەلسە بايقاۋعا قاتىسىڭىز. ويىڭىزدا جۇرگەن جوبا جۇزەگە اسىپ، ءوڭىردىڭ ىشكى ءتۋريزمىنىڭ تۇرلەنۋىنە تۇرتكى بولۋى ابدەن مۇمكىن. سونىمەن قاتار، جەڭىمپازعا قوماقتى قارجىلىق سىيلىق بەرىلەدى، – دەدى ءوز سوزىندە شىعىس قازاقستان وبلىستىق تۋريزم جانە سىرتقى بايلانىستار باسقارماسىنىڭ باسشىسى جاسۇلان سارسەبايەۆ.
ايتا كەتۋ كەرەك، الاكول ايماقتاعى ءتۋريزمدى دامىتۋ جوباسىندا ماڭىزى زور باعىتتاردىڭ ءبىرى بولىپ تابىلادى. بيىلعى جىلى الاكول جاعالاۋىن اباتتاندىرۋعا ءبىر ملرد. تەڭگە قارجى قاراستىرىلعان.
شقو اكىمىنىڭ باسپا ءسوز قىزمەتى
https://dalanews.kz/34170
