كەشەلى بەرى "سىرت قاسقابۇلاقتا ابايدىڭ ۇشىشەكتى دومبىراسىنىڭ سۇلبا-سۋرەتىن اياققا توسەتىپ قوياتىن" جوبا ىسكە اسۋدا!" دەگەن رەنىشتەر ەستىلىپ جاتىر جەلىدە.
بىلاي قاراساڭىز، ارينە، ول شەشىمنىڭ ءوزى يديوتيزم دە سياقتى. ءبىراق، ءبىز مىنا جاعدايدى دا ەسكەرۋىمىز كەرەك.
ماسەلەن، جەر دەگەنىڭىزدىڭ ءوزى كوركەمفيلوسوفيالىق تۇرعىدا دا، شىن ومىردە دە - انا. وعان ەشكىمنىڭ دە داۋى جوق. سول سەبەپتى، ونى دا اياقپەن تاپتاۋعا بولمايدى. ءجا، سولاي ەكەن دەپ، ءبىز كەن ىزدەمەي، ىشىپ-جەمەي، قوقىسىمىزدى توكپەي،... مولامىزدى تۇرعىزباي، اۋەدە قالىقتاپ جۇرە المايمىز عوي. دەمەك، اتالمىش جوبا دا - دۇرىس شارۋا. ول دا - جەر-انانىڭ الاقانىندا ورنالاسادى.
سول جوبا بويىنشا، ءبىز، سول كەپيەتتى وڭىرگە جولىمىز تۇسە قالعاندا، كەمەڭگەردىڭ دومبىراسىنىڭ قاسيەتىن تابانىمىزبەن دە سەزىنە، "تيەگى مەن قۇلاعىنا" ءتاۋ ەتە، ونىڭ اينالاسىنداعى قىرىق بەس تاسقا قاشالا ورنەكتەلگەن "قارا سوزدەردەگى" دانالىقتىڭ لەبىن دە سانامىزبەن بەك سىڭىرە، ءبىر ءسات ەل بولاشاعى مەن رۋحانيات تۋرالى دا ويعا شوما اياڭداي باسىپ، قاسقابۇلاقتىڭ كاۋسارىنان قارا ولەڭنىڭ دە ءنارىن تاتىپ الماققا بارا جاتامىز...
ءجا، مىناداي ەكىنشى جاعداي بار. ماسەلەن، دومبىرا ءمىنسىز جاسالسىن-اق، وعان ءقوڭىرۇندى قوي ىشەگى تاعىلسىن-اق، ادەمى كۇيلەنسىن-اق، ەگەر تيەك بولماسا، ءبارى - بەكەر. دومبىرانىڭ مىيى دا، جۇرەگى دە - تيەك. ونسىز دومبىرا - مىلقاۋ.
ال، جوباداعى "تيەك" - تاستان قاشالا ورناتىلعان، كولەمى ساندىقتاي ورنەكتى "تيەك". سول سەبەپتى دە ول اياققا تاپتالمايدى.
دەمەك، "اباي دومبىراسى" دا اياققا تاپتالمايدى دەگەن ءسوز. سول "اباي دومبىراسىنىڭ" ءوزى، بەينەلەپ ايتقاندا، - "دومبىرانىڭ كولەڭكەسى" عانا. ال، دومبىرانىڭ كولەڭكەسىن تاپتاما!" دەگەن تىيىم جوق.
بولسا، وندا ءبىز ۇلى تۇزدە، شاقىرايا شىجىعان كۇن استىنداعى بابالار مازارىنىڭ كولەڭكەسىن اياعىمىزبەن باسىپ تۇرىپ، سۇيەگى سول مازارلاردا ساقتالعان قاسيەتتى ارۋاققا دا ءمىناجات ەتە الماس ەدىك قوي!..
ءۇشىنشى جاعداي. "جۇلدىزدار اللەياسى". اياق استىنداعى ونداي اللەيالار الەمنىڭ بىرنەشە قالالارىندا جاسالعان. موسكۆاداعىسىندا ءوزىمىزدىڭ جۇلدىزىمىز روزا رىمبايەۆا قارىنداسىمىزدىڭ ءاتى-جونى جازىلعان "جۇلدىز" دا بار.
[perfectpullquote align="full" bordertop="false" cite="" link="" color="" class="" size=""]
ءتورتىنشى جاعداي. گەوگليف ماسەلەسى. سارىارقادا ونداي عاجاپتاردىڭ كوسموستان دا انىق كورىنەتىن تالاي نۇسقالارى ساقتالعان. "اباي دومبىراسى" جوباسى دا - سونداي ءبىر گەوگليف.[/perfectpullquote]
بەسىنشى، ەڭ باستى ماسەلە. جەربەتىندىك تىرشىلىك يەلەرى ءۇشىن كۇننەن اسقان قاسيەتتى ەشتەڭە جوق. "جانىمىز - كۇننەن كەلگەن نۇردان، ءتانىمىز - توپىراق پەن سۋدان". شاھكەرىم اۋليە سولاي دەيدى. ال، سول كۇننىڭ بەينەسىن ءبىز جامبى تۇرىندە جاساپ، ونى جەبەمەن اتىپ، مەرگەندىگىمىزدى سىنايمىز. جاقشىلىققا باۋليتىن سپورت ويىنى سونداي. التىن جامبى - كۇن سيمۆولى. جامبى" اتاۋى دا - كۇننىڭ ەجەلگى يام (جام؛ م+ب سيمبوزى ارقىلى، "جام+ب/ى/" تۇرىندە قالىپتاسقان) اتاۋىنان. دومبىرانىڭ ءوزى دە - كۇن سيمۆولى. توعىز پەرنەسى - كۇننىڭ اق نۇرىنان تارايتىن توعىز ءتۇرلى توعىز نۇر يشاراسى. دومبىرا مويىنى - كۇننەن تارالاتىن نۇرلاردىڭ جالپى سيپاتىن سۋرەتتەيدى. دومبىرانىڭ شاناعى - "كۇننىڭ ءوزى". ونىڭ ورتاسىنداعى ويىق - كۇننىڭ رۋح-قۇدايىن بەينەلەيدى.
سوندىقتان، "اباي دومبىراسى" جوباسىنا قاتىستى شۋ كوتەرىپ جاتقان اعايىنداردىكى دۇرىس ەمەس دەپ ويلايمىز. ارىبەرىدەن سوڭ، سول داڭعازا كوتەرىپ جاتقان ازاماتتاردىڭ ءبىرازى - ەدەنىنە دومبىرا سۋرەتى سالىنعان ۇلكەن ساحنالاردا تالاي رەت تامىلجىتا ءان دە شىرقاعان تارلان جىگىتتەر.
وسەك بولماس ءۇشىن، ايتا كەتەيىن. ءوز باسىمنىڭ ول جوباعا ەشقانداي دا قاتىسىم جوق. تالداۋلارىنا دا، ساراپتاۋلارىنا دا، شەشىمنىڭ قابىلدانۋىنا دا مەنى ەش اكىمشىلىك شاقىرعان ەمەس.
