اعىمداعى جىلدىڭ 6 مامىرىندا توتەنشە جاعداي كەزىندە تابىستان ايىرىلۋعا بايلانىستى مەملەكەتتىك الەۋمەتتىك ساقتاندىرۋ قورىنان (بۇدان ءارى - ءماسق) تولەم تاعايىنداۋ قاعيدالارىنا ءتيىستى وزگەرىستەر ەنگىزىلدى.
«ۇيالى بايلانىس وپەراتورىنىڭ ەلەكتروندىق ءاميانىنىڭ» شوتىنا الەۋمەتتىك تولەم الۋ ءۇشىن ازامات SMS-حابارلاما ارقىلى ءوزىنىڭ كەلىسىمىن راستاۋى قاجەت.
ازاماتتان جاۋاپ العاننان كەيىن وپەراتور الۋشىنىڭ جەكە سايكەستەندىرۋ ءنومىرىن (بۇدان ءارى – جسن) تەكسەرىپ، ۇيالى تەلەفونىنىڭ جەكە شوتىنا اقشانى جىبەرەدى. ونى حالىق بانكىنىڭ بانكوماتتارى نەمەسە قازپوشتا بولىمشەلەرى ارقىلى الۋعا بولادى. ارنايى ءموبيلدى ەلەكتروندىق ءاميان قوسىمشاسىنىڭ كومەگىمەن 2000-عا جۋىق قىزمەتتىڭ اقىسىن تولەۋگە بولادى. مەحانيزم پيلوتتىق تارتىپتە جۇزەگە اسىرىلدى. بۇل نۇسقا قىتايدا، ءۇندىستاندا، ءبىرقاتار ەۋروپا جانە ازيا ەلدەرىندە ءساتتى قولدانىلۋدا.
بۇل الەۋمەتتىك تولەم جاساۋدىڭ جەدەل ەنگىزىلگەن مۇلدەم جاڭا تەتىگى. 6 مامىردان باستاپ ازاماتتارعا ونى پايدالانۋعا مۇمكىندىك بەرىلدى.
بۇدان باسقا، قاتە بەرىلگەن ءوتىنىشتى كەرى قايتارىپ العىسى كەلەتىن ازاماتتاردىڭ وتىنىشتەرى بولدى. وسىعان بايلانىستى، وسىنداي مۇمكىندىك بەرۋ ماقساتىندا قاعيدالارعا وزگەرىستەر ەنگىزىلىپ، تەحنيكالىق شەشىمدەر ازىرلەندى. ەندى ءوتىنىشتى كەرى قايتارىپ الۋ تۋرالى ءوتىنىشتى الەۋمەتتىك تولەم تۋرالى ءوتىنىش بەرگەن تارتىپپەن بەرۋگە بولادى.
سونىمەن بىرگە، قاعيدالاردىڭ تالابىن ساقتاماعانى ءۇشىن الەۋمەتتىك تولەم تاعايىنداۋدان باس تارتىلعان ازاماتتارعا، توتەنشە جاعداي كەزىندە ەنگىزىلگەن شەكتەۋلەرگە بايلانىستى تابىسىنان ايىرىلۋ دەرەگىن راستايتىن قۇجاتتار بولعان جاعدايدا، جۇمىسپەن قامتۋ ماسەلەلەرى جونىندەگى اۋداندىق (قالالىق) شتابتارعا قايتا جۇگىنۋ مۇمكىندىگى بەرىلدى.
مىسالى، ەكى نەمەسە ودان دا كوپ جەردە جۇمىس ىستەيتىن (وتىنىشتە كىرىستى جوعالتۋ تۋرالى ءبىر جۇمىس بەرۋشىنى كورسەتكەن، الايدا ءىس جۇزىندە باسقا جۇمىس بەرۋشىدە دە اقىسىز دەمالىسقا جىبەرىلگەن)، جك پاتەنتى بويىنشا ناۋرىز-مامىر ايلارىن قوسا العانداعى كەزەڭ ءۇشىن الەۋمەتتىك اۋدارىمدار/مىندەتتى زەينەتاقى جارنالارىن تولەگەن (ءبىراق ءىس جۇزىندە توتەنشە جاعدايعا بايلانىستى وسى كەزەڭدە كىرىس الماعان) ازاماتتار دا بولۋى مۇمكىن.
قولدانىستاعى قاعيدالارعا سايكەس «42 500 تەڭگە» تولەمى ازاماتتاردىڭ كەلەسى ساناتتارىنا تاعايىندالادى:
- جەكە كاسىپكەرلەر مەن شاعىن جانە ورتا كاسىپورىنداردىڭ جالاقىسىز دەمالىسقا جىبەرىلگەن قىزمەتكەرلەرى؛
- كارانتين ەنگىزىلگەن ەلدىمەكەندەردە جۇمىس ىستەيتىن ءىرى كاسىپكەرلىك سۋبەكتىلەرىنىڭ جالاقىسىز دەمالىسقا جىبەرىلگەن قىزمەتكەرلەرى؛
- مەملەكەتتىك مەكەمەلەردى ەسەپتەمەگەندە، كوممەرسيالىق ەمەس زاڭدى تۇلعالاردىڭ جالاقىسىز دەمالىسقا جىبەرىلگەن قىزمەتكەرلەرى؛
- جەكە تاجىريبەمەن اينالىساتىن تۇلعالارعا (نوتاريۋس، جەكە سوت ورىنداۋشىسى، ادۆوكات، كاسىبي مەدياتور)؛
- قازاقستان رەسپۋبليكاسى سالىق كودەكسىنىڭ 774-بابىنا سايكەس ءبىرىڭعاي جيىنتىق تولەم (بۇدان ءارى – بجت) تولەۋشى بولىپ تابىلاتىن جەكە تۇلعالار؛
- نىساناسى جۇمىستاردى ورىنداۋ (قىزمەتتەر كورسەتۋ) بولىپ تابىلاتىن ازاماتتىق-قۇقىقتىق سيپاتتاعى (بۇدان ءارى – اقس) شارتتار بويىنشا تابىس تاباتىن، سالىق اگەنتتەرى ولار ءۇشىن مىندەتتى زەينەتاقى جارنالارىن اۋدارعان ادامدار.
1) جانە 2) تارماقشالاردىڭ جارعىلىق كاپيتالىندا اكسيالار مەن قاتىسۋ ۇلەسى تىكەلەي نەمەسە جاناما تۇردە مەملەكەتكە تيەسىلى زاڭدى تۇلعالاردىڭ، ەكىنشى دەڭگەيلى بانكتەردىڭ، بانك وپەراسيالارىنىڭ جەكەلەگەن تۇرلەرىن جۇرگىزەتىن ۇيىمداردىڭ قىزمەتكەرلەرىنە قاتىسى جوق.
بۇل ناقتىلاۋ جوعارىدا اتالعان ۇيىمداردىڭ توتەنشە جاعداي كەزىندە قىزمەتىن جۇزەگە اسىرعانىنا نەگىزدەلگەن.
قاعيدالاردىڭ بۇدان بۇرىن قولدانىستا بولعان نورمالارى بويىنشا توتەنشە جاعداي كەزىندە تابىستان ايىرىلۋعا بايلانىستى ءماسق-تان تولەم تاعايىندالمايتىن ساناتتار وزگەرىسسىز قالدى. ولارعا:
- توتەنشە جاعداي ەنگىزىلگەن ۋاقىتقا دەيىن 12 اي ىشىندە مىندەتتى الەۋمەتتىك ساقتاندىرۋ جۇيەسىنە قاتىسۋىنىڭ ءبىر دە ءبىر اي ءوتىلى جوق ادامدار، ال بجت تولەۋشىلەر ءۇشىن – ءوتىنىش بەرگەنگە دەيىن؛
- توتەنشە جاعداي ەنگىزىلگەن ۋاقىتقا دەيىن 12 اي ىشىندە جيناقتاۋشى زەينەتاقى جۇيەسىنە قاتىسۋىنىڭ ءبىر دە ءبىر اي ءوتىلى جوق اقس شارتتار بويىنشا كىرىس الاتىن جەكە تۇلعالار؛
- كاسىپكەرلىك قىزمەتتى قوسا العاندا، ەكى نەمەسە ودان دا كوپ جۇمىستى قوسا اتقاراتىن، ەڭبەك نەمەسە كاسىپكەرلىك قىزمەتتى (ونىڭ ىشىندە قاشىقتان) جالعاستىرعان نەمەسە اقىلى ەڭبەك دەمالىسى بەرىلگەن نەمەسە جۇمىس ورىندارىنىڭ بىرىندە توقتاپ تۇرۋ بولعان ادامدار؛
- توتەنشە جاعداي ەنگىزىلگەننەن كەيىن بجت العاش رەت تولەگەن، سونداي-اق ءبىر مەزگىلدە رەسپۋبليكالىق بيۋدجەتتەن تولەنەتىن اي سايىنعى زەينەتاقى تولەمدەرى مەن مەملەكەتتىك جاردەماقىلاردى نەمەسە قوردان (ءماسق) تولەنەتىن الەۋمەتتىك تولەمدەردى الۋشىلار بولىپ تابىلاتىن تۇلعالار؛
- قازاقستان رەسپۋبليكاسىنان تىس جەرگە تۇراقتى تۇرۋعا كەتۋىنە بايلانىستى ىشكى ىستەر ورگاندارىندا تىركەۋدەن شىعارىلعان ادامدار.
ءوتىنىش بەرۋشىلەر ۇسىنعان مالىمەتتەردى اقپاراتتىق جۇيەلەر ارقىلى تەكسەرۋ كەزىندە تولىق مەملەكەتتىڭ قامسىزداندىرۋىنداعى ازاماتتار «42 500 تەڭگە» تولەمىنە ءوتىنىش بەرگەنى انىقتالىپ، الەۋمەتتىك تولەم تولەنبەيتىن ازاماتتاردىڭ ساناتى كەلەسى ازاماتتارمەن تولىقتىرىلدى:
- تولىق مەملەكەتتىڭ قامسىزداندىرۋىنداعى قىلمىستىق-اتقارۋ جۇيەسىنىڭ مەكەمەلەرىندەگى ادامدار.
اتاپ وتەرلىك جايت، «42 500 تەڭگە» الەۋمەتتىك تولەمىن تاعايىنداۋعا 2020 جىلعى 11 مامىر كۇنى ساعات 18:00-گە دەيىن كەلىپ تۇسكەن وتىنىمدەر بەلگىلەنگەن تارتىپپەن قارالاتىن بولادى جانە قاعيدالاردا كورسەتىلگەن شارتتارعا سايكەس كەلگەن جاعدايدا، الەۋمەتتىك تولەم تاعايىندالادى جانە تولەنەدى.
