Қазақстандағы инфляция 2025 жылы қаңтарда үдей түсіп, бір жылда 8,9% (2024 жылғы желтоқсанда – 8,6%), бір айда 1,1% құрады (өткен айда – 0,9%). Бұл көрсеткіш бұған дейінгі болжамдардағыдан асып түсіп, сарапшылар қауымын дүр еткізді, деп жазады Dalanews.kz.

Ұлттық статистика бюросының мәліметінше, баға ақылы қызметтерге бір жылда 13,8% (2024 жылғы желтоқсанда – 13,3%), азық-түлік емес тауарларға – 8,4% (2024 жылғы желтоқсанда – 8,3%), азық-түлік тауарларға – 5,8% (2024 жылғы желтоқсанда – 5,5%) өсті.

Жалпы, жылдық деңгейде цифрлар былай қалыптасты:

• азық-түлік инфляциясы - 5,8% (желтоқсанда - 5,5%)
• азық-түлікке жатпайтын тауарлар инфляция - 8,4% (8,3%)
• қызмет көрсету саласындағы инфляция - 13,8% (13,3%).

Қаңтар айында азық-түлік және алкогольсіз сусындар (2,2 п.т.), коммунальдық қызметтер (1,7 п. т.), киім-кешек және аяқ киім (1 п. т.) инфляцияның жылдық деңгейіне ерекше үлес қосты. Сонымен қатар, ақылы қызметтердің жылдық инфляцияға қосқан үлесі қаңтарда 4,0 п. т. дейін көтерілді.

"Ресми статистика ақылы қызметтер өсімінің жеделдеуі (ТКШ тарифтерінің қымбаттауы), сондай-ақалғашқы екі-үш айға ерекше әсер беруші теңгенің құныздануынан болған экономикалық проинфляциялық тәуекелдердің іске асқанын байқатады. Сонымен қатар,алдан күтілетін жоғары инфляциялық болжамдар да инфляцияға қысым көрсетуде. Біз Ұлттық Банкі өткен Ақша-несие саясаты бойынша комитет отырысында кейінге қалдырған мәселелер бойынша неғұрлым батыл шешім қабылдауы керек еді деп санаймыз. Енді инфляцияға қатысты жағдай бақылаудан шығып, болжамды инфляция траекториясына енбей қалу ықтималдылығы жоғары", деп жазды Ғалымжан Айтқазин Tengemotika арнасында. 

Сондай-ақ "Комментарий" талдау тобының жетекшісі, экономист Эльдар Шамсутдинов та инфляция көрсеткіші болжамдардан асып түсіп, бұл факт ақша-несие саясатын қатаңдату қажеттілігін растайтынын айтады.

"Ұлттық Банк базалық мөлшерлемені ертерек көтеруі керек еді, сонда инфляцияның одан ары өсу аясы тарылады. Инфляцияның шамалы үдеуі де алдан күтілетін көрсеткішті де зорайтып, болашақ атқарылатын шаралардың тиімділігін төмендетеді. Ол, өз кезегінде баға динамикасын бақылауды қиындатады", - дейді маман.

Бұған дейін AERC талдау орталығы 2025 жылы инфляция 7%-ға жетуі мүмкін деп болжаған. ҚР Ұлттық банкінің сарапшылар қауымдастығы арасында қаңтар айында жүргізілген макроэкономикалық сауалнаманың нәтижесіне сәйкес,сарапшылар 2025 жылы күтілетін инфляция көлемін 7,5%-ға дейін көтерген еді.