2025 жылдың қаңтар–қыркүйек айларында елдегі қолма-қолсыз төлемдер көлемі 135,2 трлн теңгеге жетті. Бұл өткен жылмен салыстырғанда 15,5% жоғары. Қазақстан қаржыгерлері қауымдастығының мәліметінше, бүгінде барлық төлемдердің 87 пайызы қолма-қолсыз жүзеге асады, деп хабарлайды Dalanews.kz.

QR-код арқылы жасалған төлемдер 14 трлн теңгеге жетіп, тарихта алғаш рет POS-терминалдардағы айналымды (12,9 трлн теңге) басып озды.

Интернет-төлемдердің үлесі 80,5%-дан 75,3%-ға төмендеді. Сарапшылар мұны халықтың одан да жылдам әрі қолайлы төлем әдістеріне көшуімен байланыстырады.

Қолма-қол ақша айналымда бар болғанымен, оның маңызы азайып келеді. Банкоматтардан 20,1 трлн теңге алынғанымен, қолма-қолсыз төлемдер көлемі бұл көрсеткіштен 6,7 есе көп.

Қолма-қолсыз операциялардың үштен екісі Алматы, Астана және Шымкентте жасалады.

Дегенмен, облыстар арасындағы цифрлық айырмашылық тарылып келеді. Акмола, Жетісу және Түркістан облыстары қолма-қолсыз төлемдердің ең жоғары өсімін көрсеткен өңірлердің қатарында.