АҚШ Қазақстанға қатысты өзара сауда баждарын енгізуде, деп хабарлайды Dalanews.kz.

Астана уақыты бойынша бейсенбіге қараған түні Ақ үй жариялаған тізімге сәйкес, АҚШ Қазақстаннан әкелінетін тауарларға 27% мөлшерінде кедендік баж салығын енгізбек. Бұл көрсеткіш жеңілдіктерді ескере отырып есептелген.

Сонымен қатар кестедегі деректерге сүйенсек, Қазақстан АҚШ-қа қатысты 54% мөлшерінде баж салығын қолданады. Бұл шешім валютаға жасалатын манипуляциялар мен сауда кедергілерін ескерумен қабылданған.

Әйтсе де шамамен 200 ел қамтылған бұл тізімде Ресей жоқ.

Айта кетейік, АҚШ президенті Дональд Трамп сауда тапшылығына байланысты елде төтенше жағдай енгізу туралы жарлыққа қол қойды.

Жарлыққа сәйкес, 5 сәуірден бастап 10% мөлшеріндегі минималды базалық кедендік баж салығы енгізіледі. Алайда бұл талап 5 сәуірге дейін кемелерге тиеліп, соңғы транзит кезеңінде тұрған тауарларға қолданылмайды. Сонымен қатар кейбір елдерге қатысты “айна” тарифтері 9 сәуірден бастап күшіне енеді.

Жаңа тарифтер қолданыстағы баж салығы мен алымдарды толықтырады. Дегенмен кейбір тауарларға бұл өзгеріс әсер етпейді. Атап айтқанда, болат пен алюминий өнімдеріне, сондай-ақ көліктер мен автокөліктің қосалқы бөлшектеріне салынатын 25%-дық баж салығы 3 сәуірден бастап күшіне енеді. Сонымен қатар мұндай тарифтер мыс, фармацевтикалық препараттар, жартылай өткізгіштер, ағаш өнімдері, маңызды пайдалы қазбалар, энергия мен энергоресурстарға қолданылмайды.

Трамптың жарлығында АҚШ-тың сауда тапшылығы өткен жылы 1,2 трлн долларды құрағаны атап көрсетілген. CNN-нің хабарлауынша, төтенше жағдай енгізілуі президентке тарифтерді реттеу бойынша кеңейтілген өкілеттіктер береді.

Сонымен қатар Трамп басқа мемлекеттер қарсы шаралар қабылдаған жағдайда немесе АҚШ-тағы өндірістік қуаттар мен өнім көлемі одан әрі төмендесе, баж салығының мөлшерін және қолданылу аясын өзгерту құқығын өзіне қалдырды.