Түркістан облысында шегірткеге қарсы күрес жұмыстары жүргізіліп жатыр, деп хабарлайды Dalanews.kz
Сарыағаш ауданының әкімі Арман Абдуллаевтың айтуынша, сарыағаштықтар шегірткемен «күреске» дайын.
Аудан 15 аумаққа бөлініп, шекаралары белгіленген. 15 топқа 445 анықтаушы тартылады деп жоспарланып отыр. Оларды тасымалдауға 18 автокөлік бөлініп, жергілікті әкімдіктен 25 азамат жұмысты үйлестіруге жауапты болып бекітілген. Барлық аумақ анықтаушыларға арналған жатын орнымен қамтылған.
Сарыағаш ауданында залалсыздандыруға 75 бүрку техникасы, 1 «АН-2» ұшағы қатысады, 125 аспалы бүріккіш берілді.
З
иянкестерді химиялық өңдеу жұмыстары Ақжар, Әлімтау, Дарбаза, Дербісек, Жылға, Жібек жолы, Тегісшіл, Қызылжар ауылдық округтерінің аумағында жалпы 81,3 мың гектарда жүргізіледі деп көзделген.
Нұрбол Тұрашбеков залалсыздандыру жұмыстарына мүмкіндігінше жергілікті азаматтарды қатыстыру керегін ескертті.
– Әр ауылдың қауіпті аймағын сол елдің тұрғылықты азаматтарынан артық ешкім білмейді. Мейлінше залалсыздандыру жұмыстарына жергілікті тұрғындардың қатысуына мән беріңіздер. Ешқандай шағым назардан тыс қалмасын, – Түркістан облысы әкімінің орынбасары Нұрбол Тұрашбеков.
Қазіргі таңда болжам орталығының мамандары дернәсілдер анықталған алаңдарды тұрақты бақылауында ұстап отыр.
Еске салайық, биыл оңтүстікте көктем қысқа болып, күн күрт ысып кетті. Салдарынан Түркістан облысында шегірткелер ерте шығып, шаруалар алаңдап отыр. Шегірткелер жан-жақты жайпап кетпесі үшін мамандар дәрілеу жұмыстарын жылдағыдан ерте бастады.
