Қалалардағы шағын және орта бизнес субъектілерін қаржыландыруға арналған 1,043 млрд теңгені бірінші болып «Нұрбанк» АҚ алады. 2 тамыз күні Даму» Қоры мен «Нұрбанк» АҚ арасында аталған келісімге қол қойылды.
Сондай-ақ «Нұрбанк» «Даму Оптима» бағдарламасына да қатысады. Бұл бағдарлама бойынша екінші деңгейлі банк алдында кепілзаты жетпеген кәсіпкерлер «Даму» Қорының кепілдігін пайдаланып несие ала алады.
Жақын уақытта Қор екінші деңгейлі 5 банкпен 3,557 млрд теңгелік осындай келісімге қол қояды деп жоспарланған.
Несие аталған Бағдарлама аясында Қазақстанның қалаларында жүзеге асырылып жатқан немесе жүзеге асырылады деп жоспарланып отырған жобаларға беріледі.
Талаптары:
Мақсатты топ: жұмыссыздар (еңбекпен қамту мекемесіне тіркеуге тұрған-тұрмағанына қарамастан), кәсіпкерлік әлеуеті бар өзін-өзі асыраушылар, несие алуға өтінім бергенге дейін ШОБ субъектісі ретінде тіркелген ауылшаруашылық кооператив пен оның мүшелері және микрокәсіпкерлік нысандары, ісін жаңа бастаған, бизнесі бар кәсіпкерлер.
Несиенің мөлшерлемесі – жылына 6%-дан аспайды;
Бір кәсіпкердің қолына – 8 000 (сегіз мың) АЕК көлеміне дейінгі қаржы тиеді. (республикалық бюджетте биылға белгіленген көрсеткіш бойынша);
Мақсаты мен мерзімі: инвестиция үшін 5 жылға дейін; айналым қаражатын толықтыру үшін 3 жылға дейін;
Басымдық берілетін салалар - несие/микронесие салалық шектеусіз беріледі.
Дей тұрғанмен, несие/микронесиелер сауда-саттық мақсатындағы жобалардың айналым қаражатын толықтыруға берілмейді. Тек бұл салада ісін жаңа бастаған кәсіпкерлер ғана қаржы ала алады.
Шектеулер мен тиымдар – ісін жаңа бастаған кәсіпкерлер несие/микронесиеге «Бастау Бизнес» жобасы аясында кәсіпкерлік негіздерін оқып, сертификат алғаннан кейін қол жеткізеді немесе Қордың басқа бағдарламалары бойынша соңғы екі жыл ішінде кәсіпкерлік негіздерін оқығаны жайлы сертификаты болуы керек.
