ONAY! Алматы қаласы оқушыларына арналған жеңілдікпен берілетін виртуалды карталардың пилоттық жобасын іске қосты, сондай-ақ виртуалды карталар үшін жаңа жол жүру абонементтерін ұсынды. Бұл цифрлық шешімдер қала тұрғындары үшін қоғамдық көлікті пайдалануды жеңілдетуге, қауіпсіз және қолжетімді етуге бағытталған.
Пластикалық картаның орнына - цифрлық формат.
Енді балаға пластикалық картаны өзімен бірге алып жүрудің қажеті жоқ — жол ақысын тікелей смартфон арқылы төлеуге болады. Алматы қаласының оқушыларына арналған жеңілдікпен берілетін виртуалды картаны ата-аналар өз телефондарында ONAY! мобильді қосымшасы арқылы онлайн рәсімдей алады. Процесс толық автоматтандырылған: ата-ана өз және баласының деректерін растайды, содан кейін жүйе пайдаланушының келісімі негізінде қажетті ақпаратты мемлекеттік деректер қорынан алады. Телефон жоғалған жағдайда, аккаунтты қалпына келтіруді ONAY! қосымшасында өз бетінше жасауға болады - қызмет көрсету орталықтарына барудың қажеті жоқ.
Экологиялық әсер және пластикті азайту.
Жеңілдікпен берілетін виртуалды карталардың іске қосылуы пластикалық карталарды пайдалануды азайтып, қоршаған ортаға түсетін салмақты төмендетуге мүмкіндік береді. Цифрлық форматқа көшу Алматы қаласының экологиялық тұрақтылық пен «жасыл» цифрландыру мақсаттарын қолдайды, осылайша қоғамдық көлік тек ыңғайлы ғана емес, экологиялық «таза» да бола түседі.
Қауіпсіздік және мемлекеттік сертификаттау
Аталған жобаларды жүзеге асыру барысында ONAY! Қазақстан Республикасының Мемлекеттік техникалық қызметі арқылы ақпараттық қауіпсіздік саласында сынақтан сәтті өтті. Нәтижелер жүйенің тиісті деңгейде қорғалғанын және белгіленген талаптарға сай екенін растады. Бұл интеграцияның мемлекеттік ақпараттық жүйелермен қауіпсіз байланысын және пайдаланушылар келісімі негізінде дербес деректерді алу мүмкіндігін қамтамасыз етті.
Барлық виртуалды карталарға арналған жаңа жол жүру абонементтері.
Оқушыларға арналған жеңілдікпен берілетін виртуалды карталармен қатар ONAY! Алматы мен Қарағанды қалаларының барлық виртуалды карталары үшін жаңа жол жүру абонементтерін іске қосты. Абонементті ONAY! мобильді қосымшасы арқылы онлайн рәсімдеп, төлем жасауға болады. Бұл шешім жолаушыларға көлік шығындарын алдын ала жоспарлауға және таңдаған мерзім ішінде қоғамдық көлікті шектеусіз пайдалануға мүмкіндік береді.
Әлеуметтік маңызы және даму жоспарлары.
Жоба қоғамдық көліктің қолжетімділігін арттыруға, халыққа қызмет көрсету орталықтарындағы жүктемені азайтуға және пластикалық карталарды пайдалануды қысқартуға ықпал етеді. Бұл өз кезегінде қаланың тұрақты даму мен цифрландыру мақсаттарын қолдайды. Пилоттық кезең аяқталғаннан кейін ONAY! жобаны басқа да жеңілдік санаттарына — студенттер мен зейнеткерлерге кеңейтуді және басқа қалаларда енгізуді жоспарлап отыр. Компания сонымен қатар цифрлық сервистерді дамытып, пайдаланушылар тәжірибесін жетілдіруді жалғастырады.
