Ресейлік "Лукойл" компаниясы Алматы мен Өскеменді байланыстыратын тас жолының бойында толық қызмет көрсететін екінші жанармай құю станциясын іске қосты, деп хабарлайды Dalanews.kz.

Компания өкілдерінің мәліметінше, бұл бекет те сәуір айында ашылған алғашқы "Лукойл" жанармай станциясы сияқты франчайзингтік үлгіде жұмыс істейді. Станцияда "Лукойл" компаниясының фирмалық ECTO отыны, оның ішінде премиум ECTO 100 бензині пайдаланылатын болады. Жүк көліктері мен жеңіл автокөліктерге арналған бөлек жанармай құю желілері бар, 22 жанармай колонкасы қызмет көрсетеді.

"Компания Қазақстандағы жанармай құю станцияларының желісін дамытуды жалғастырады", — деп мәлімдеді "Лукойл" өкілдері.

"Лукойл" 1995 жылдан бері Қазақстанда жұмыс істеп келеді. Компания мұнай өндіру және тасымалдау, майлау материалдарын өндіру, сондай-ақ жасыл энергетика саласындағы жобаларды жүзеге асырады. Қазақстандағы маңызды жобаларға Теңіз мұнай жобасындағы 5% үлесі, Қарашығанақтағы 13,5% үлесі және Каспий құбыр консорциумындағы қатысуы жатады.

2023 жылдың соңындағы жағдай бойынша, "Лукойлдың" 19 елде 5258 жеке меншік, жалға алынған, франчайзингтік және уақытша жабылған жанармай құю станциялары болған.

"Ресейлік ірі мұнай алпауыттарының Қазақстандағы осындай бастамалары еліміздің энергетикалық және экономикалық тәуелсіздігіне қалай әсер етеді? Бұл станциялардың франчайзингтік модельде жұмыс істеуі тек сырттай қарағанда қазақстандық кәсіпкерлерге мүмкіндік беретіндей көрінгенімен, шын мәнінде елдің мұнай-газ саласындағы шетелдік ықпалын күшейтуі ықтимал.

Қазақстанның жасыл энергетикаға бет бұру бастамасы мен Ресейдің энергетикалық мүдделерінің тоғысуы да өз алдына бір сұрақ туғызады", - дейді осы орайда сарапшылар.