Ертеңнен бастап жаңа өзгеріс енгізіледі, осыған орай ІІМ жүргізушілерге үндеу жасады, – деп хабарлайды Dalanews.kz.

5 сәуірден бастап тіркелмеген мопедті басқаруға тыйым салынады.

"Құқықбұзушылықтардың алдын алу үшін еліміздің жолдарында полицейлер азаматтарға жаңа талаптар мен ережелерді белсенді түрде түсіндіріп жатыр. Тәртіп сақшылары мопед иелеріне арнайы ХҚКО-ға барып, көлік құралдарын тіркеу және тиісті құжаттарды алу қажеттігін еске салады", - деп жазылған хабарламада.

Бүгінде республика бойынша 23 мыңнан аса мопед тіркелген. Заңға сәйкес оларды тек А1, А немесе В санатындағы жүргізуші куәлігі болған жағдайда ғана басқаруға болады.

"Бұл талап жолдардағы қауіпсіздікті арттыруға және жол апаттарының санын азайтуға көмектеседі", - деп жазылған хабарламада.

Айта кетейік, мұндай құқықбұзушылық анықталған жағдайда Әкімшілік кодекстің 590-бабының 2-бөлігіне сәйкес жауапкершілік көзделеді.

Оны тіркеу үшін тұрғылықты жері бойынша арнайы халыққа қызмет көрсету орталығына жүгіну қажет. Мына құжаттарды ала бару керек: жеке басты куәландыратын құжат, электрон түрі де жарайды, техникалық құжат немесе мопедтің техникалық сипаттамалары туралы мәліметтер.