Қуандық Бишімбаевтың ата-анасы туыстары Кайрат Кемеловты сотқа беріп, өздерінің ар-намысы мен қадір-қасиетіне нұқсан келтіретін пікірлер үшін жауапкершілікке тартуды талап еткен еді. Астана қаласының азаматтық істер жөніндегі ауданаралық соты бұл талапты жартылай қанағаттандырды, деп хабарлайды Dalanews.kz.
Даудың туындауына Кемеловтың 2025 жылғы 14 қаңтарда YouTube-тегі «Айран» арнасына берген сұхбаты себеп болған. Онда ол Бишімбаевтар отбасына қатысты екі даулы пікір айтқан:
«Сол күні әңгіме болды, олар мені мәйітханаға барып, менің сотмедицинадағы әріптестерімнен Қуандық Бишімбаевтың пайдасына қорытынды беруді сұрауға шақырды»;
«Иә, егер біреу жалғандыққа барамын десе, олар оған қомақты сома беруге дайын болды».
Сот осы екі пікірді шындыққа жанаспайды және Бишімбаевтардың абыройына нұқсан келтіреді деп танып, Кемеловты дәл сол YouTube-арнада – «Айранда» – ресми түрде оларды теріске шығаруға міндеттеді.
Моральдық өтемақы да тағайындалды. Валихан Бишімбаев пен Альмира Нұрлыбекова әрқайсысы 100 000 теңгеден алады. Бұған қоса, Кемелов талапкерлердің соттағы өкілдік және қосымша шығындарын өтеуі тиіс: Бишімбаевқа – 200 мың теңге мен 4 932 теңге мемлекеттік баж, Нұрлыбековаға – 200 мың теңге, 75 мың теңге нотариус қызметі және сондай-ақ 4 932 теңге баж. Осылайша, Кемеловтың жалпы төлейтін сомасы 610 мың теңгені құрайды.
Айта кетейік, талапкерлер бастапқыда әрқайсысы үшін 8 миллион теңгеден, жалпы 16 миллион теңге өтемақы сұраған болатын. Бірақ сот бұл соманы шектеп, арызды ішінара ғана қанағаттандырды.
Бұл шешімге бір ай ішінде апелляциялық шағым түсіруге немесе прокурордың наразылық білдіруіне болады. Шағымдар Астана қалалық сотының азаматтық істер жөніндегі сот алқасында қаралады. Сотқа қатыспаған тұлғалар үшін бұл мерзім шешім көшірмесін алған күннен басталады.
