Бүркітші Айшолпанның отбасы Моңғолиядан елге көшіп келді, - деп хабарлайды Dalanews.kz тілшісі Kazinform-ға сілтеп.
Оның сөзінше, өзі - қазір студент, елдегі университеттердің бірінде оқып жатыр.
"Мен Қазақстандамын, бір аптадай бұрын ата-анам мен бауырларым көшіп келді. Өзім Алматыдағы С.Демирел атындағы университетте қазақ тілі мен әдебиеті мамандығы бойынша 4-курста оқып жатырмын. Қазір мамандығым бойынша жұмыс қарастырып жатырмын", - деді Айшолпан.
Сондай-ақ, өнерлі қыз бүркіт өнерін тастамағанын айтты.
"Оқу мен бүркітпен айналысуды қатар алып жүрмін. Аптасына бір рет айналысамын. Жарыстарға қатысып жүрген жоқпын, тек қонақ ретінде барамын. Себебі оқудан қол тимейді", - дейді бүркітші қыз.
2018 жылы қарашада бүркітші Айшолпан туралы фильм шықты. 2019 жылы Моңғолия композиторы жерлесіміздің құрметіне өз туындысын арнаған еді. 2022 жылы бүркітші Айшолпан туралы ағылшын тілінде кітап шықты.
