Қазақстан Республикасының Премьер-министрі Олжас Бектенов Shell компаниясы барлау және өндіру бөлімшесінің президенті Питер Костелломен кездесті. Бірлескен мұнай-газ жобаларын жүзеге асыру мәселелері және ынтымақтастық келешегі талқыланды, деп хабарлайды Dalanews.kz.
Кездесуге Қазақстандағы концерннің аға вице-президенті әрі төрағасы Әли әл-Жанаби, негізгі елдер мен Намибиядағы барлау жөніндегі вице-президент Сюзанн Куган қатысты.
Shell Қазақстанда мұнай-газ саласындағы бірқатар ірі бастаманы, соның ішінде КҚК, Солтүстік Каспий, Қарашығанақ жобаларына қатысу, қысқы дизель отынын өндіру бойынша ПМХЗ қондырғысын жаңғырту, сондай-ақ жер қойнауын геологиялық барлау және ғылыми зерттеуді жүзеге асыруда.
"Кездесу барысында Қарашығанақ кен орнында қуаты жылына 4 млрд текше метрді қамтитын газ өңдеу зауытының құрылысына назар аударылып, оны жүзеге асырудың маңыздылығы атап өтілді. Сонымен қатар Қашаған кен орнын игеру жұмыстары да талқыланды. Тараптар қуаты жылына 2,5 млрд текше метрді қамтитын ГӨЗ салуды және жаңа алаңдарды игеруді көздейтін 2А және 2B кезеңдерін іске асыруды жеделдету жоспарларын қарады", делінген Үкімет баспасөз қызметінің хабарламасында.
Премьер-министр Қазақстан Үкіметінің одан әрі өзара тиімді ынтымақтастыққа дайын екенін жеткізді.
