Алматы қаласында құтқарушылар биік тауда сырқаттанып қалған туристке көмек көрсетті. Бұл туралы Төтенше жағдайлар министрлігі жазды,- деп хабарлайды Dalanews.kz

3 шілде күні құтқарушыларға теңіз деңгейінен 3360 метр биіктікте орналасқан Титова көлі маңындағы кемпинг аймағында үш туристтің жүргені, солардың бірі биіктік ауруының белгілерін сезініп жатқаны туралы хабарлама келіп түскен. Ауру белгілері: жоғары температура, қалтырау және құсу.

"Шұғыл эвакуация жүргізу үшін Республикалық жедел-құтқару жасағының жедел тобы көмекке шықты. Құтқарушылар Медеу бекетінен қажетті құралдармен – ҰҰА және спутниктік байланыс құрылғысымен жолға аттанды. Боралдай әуежайынан «Қазавиақұтқару» АҚ-ның Ми-8 тікұшағы көтеріліп, жедел ұшып шықты", – делінген министрлік хабарламасында.

Құтқарушылар науқасты эвакуациялап, оны Боралдай әуежайына жеткізді. Онда зардап шеккен адам ТЖМ Медициналық апаттар орталығының дәрігерлеріне тапсырылды. Қасындағы екі адам эвакуациядан бас тартты.