Алматы тұрғыны қаңтар айында коммуналдық төлемдердің бірнеше есе өскенін айтып, шағымданды, деп хабарлайды Dalanews.kz.

Бұл мәселеге қатысты қала әкімі Ерболат Досаев түсініктеме беріп, тарифтерге төтенше өзгеріс енгізілмегенін, тек жаңа сараланған жүйе іске қосылғанын мәлімдеді.

“Біз тарифтерді күрт көтерген жоқпыз. Тек тұтыну көлеміне қарай саралау жүйесін енгіздік. Әр адамға қажет судың орташа мөлшері есептеліп, жаңа нормалар белгіленді. Бұл жүйе есепшоттарды ретке келтіруге мүмкіндік береді. Егер тұрғындар суды үнемдеп, тек қажеттіліктерге пайдаланса, белгіленген мөлшерлеме жеткілікті болады. Тек суды артық ағызбай, кранды уақытында жабу қажет”, – деді Досаев.

Сонымен қатар әкім суды үнемдеу мәселесінің маңыздылығын атап өтіп, Алматыда қосымша су көздерін іздеу жұмыстары жүргізіліп жатқанын айтты.

“Су – баға жетпес ресурс. Біз жерасты су көздерін анықтау бағытында жұмыс істеп жатырмыз. Дегенмен қазірдің өзінде қалада су қоры жеткілікті. Алдағы уақытта оның сапасын жақсартып, тұтыну мөлшерін азайту үшін тиісті шаралар қолға алынады”, – деді қала басшысы.