Алматыда колледж студентінен туберкулез анықталғаны белгілі болды, деп хабарлайды Dala News.
Қалалық білім басқармасының мәліметінше, жағдай ата-аналардың өтінішінен кейін бақылауға алынған. Барлық санитарлық-эпидемиологиялық шаралар толық көлемде жүргізілген.
Ведомствоның мәліметіне сәйкес, 2026 жылғы 19 наурызда 4-курс студенті емханаға жүгініп, флюорографиядан өткен кезде өкпе туберкулезі анықталған.
Нәтижесі белгілі болғаннан кейін студент бірден оқу процесінен шеттетіліп, тиісті медициналық мекемеге жатқызылған.
Білім басқармасы студенттің жатақханада тұрмайтынын, ата-анасымен бірге пәтерде тұратынын атап өтті.
Колледж әкімшілігі мен медициналық қызметтер бірлесіп, шұғыл түрде эпидемияға қарсы шаралар жүргізген.
- Атап айтқанда:
- студент оқшауланып, емі дәрігерлер бақылауына алынған;
- науқаспен байланыста болғандардың барлығы тексеруден өткен;
- 1738 студент, 150 оқытушы және техникалық қызметкерлер флюорографиядан өткен;
- студент оқыған топта (20 студент, 15 оқытушы) қосымша АТР-тест пен қайта тексеру жүргізілген;
- оқу корпустары мен жатақханада толық санитарлық өңдеу жасалған;
- студенттер мен ата-аналарға түсіндіру жұмыстары жүргізілген.
Қалалық білім басқармасы жағдай толық бақылауда екенін мәлімдеді.
