7 наурыз күні Алматы әуежайында орын алған оқиға елді дүр сілкіндірді. Жолаушыларды тексеру аймағында белгісіз ер адам инспекторды кепілге алып, пышақпен қорқытқан. Алайда батыл азаматтың жедел әрекеті жағдайды бақылауға алуға көмектесті, деп хабарлайды Dalanews.kz.
Белгілі болғандай, қылмыскерді ұстауға көмектескен – Мұса Сайрамбайұлы Әбдірайымов. Ол 1973 жылы Түркістан облысы, Түлкібас ауданы, Күмісбастау ауылында дүниеге келген. Кәсіби спортпен айналысқан, бүгінде бес баланың әкесі. Сонымен қатар әнші Бағлан Әбдірайымовтың ағасы.
“Ешкім батыр боламын, қахарман боламын деп жоспармен жүрмесі анық. Дер кезінде дұрыс шешім қабылдап, өміріңізді тапсыра салғаныңыз ерлік”, — деп жазды әнші Бағлан Әбдірайымов.
Оқиға куәгерлері Мұса Әбдірайымовтың ерлігіне тәнті болды. Ол қауіпке қарамастан, қылмыскердің пышағын тартып алып, әуежай қызметкерін құтқарған. Әлеуметтік желіде “бұл – нағыз ерлік” деген пікірлер көбейіп, оның батылдығы кеңінен талқылануда.
Мемлекет басшысы Қасым-Жомарт Тоқаев Мұса Абдраймовтың батылдығын ерекше атап өтіп, оны мемлекеттік марапатқа ұсынуды тапсырды. Бұл туралы Президенттің баспасөз хатшысы Руслан Желдібай хабарлады.
“Президент қылмыскердің суық қаруын тартып алып, ұстауға көмектескен ер адамның батылдығын ерекше атап өтіп, аталған азаматты мемлекеттік наградаға ұсынуды тапсырды” деді баспасөз хатшысы.
Козачков телеграм-арнасының жазуынша, ол полиция қызметкері емес – оқиға орнына кездейсоқ тап болған және [қызметкерді босатып], өзін кепілдікке алуды ұсынған. Видеода оның пышақты үшкір жағынан жылдам тартып алғаны көрінеді.
Еске салайық, бұған дейін Алматыда ер адам әуежай қызметкерін кепілге алғанын жазған едік.
Әуежай өкілдерінің сөзінше, оқиға бүгін, 7 наурызда әуежайдың ұшу алдындағы тексеру аймағында болған.
Сағат 11:45 шамасында өзін жолаушы ретінде таныстырған ер адам ішкі терминалдағы (Т1) рейс алдындағы тексеру аймағына келген. Алматы халықаралық әуежайының авиациялық қауіпсіздік қызметінің скрининг қызметкерлері ер адамнан құжаттарын көрсетуді сұраған, бірақ ер адам скрининг офицерін шашынан ұстап алып, пышақпен қорқыта бастаған.
7 минуттан кейін әуежайдың желілік полиция бөлімінің (LPD) қызметкерлері және Алматы халықаралық әуежайының авиациялық қауіпсіздік қызметкерлері ер адамның пышағын тартып алған.
Қазіргі уақытта ер адам полиция бөлімінде, құқық қорғау қызметкерлері оқиғаның мән-жайын анықтап жатыр.
