Абай облысының ауылдық аймақтарында зиянкестерге қарсы уақытылы өңдеу шегірткелердің шабуылымен тиімді күресуге және олардың таралуын болдырмауды қамтамасыз етті. Десек те болашақ егінді сақтау үшін жағдай үнемі бақылауда ұстаудың маңызы зор, – деп хабарлайды Dalanews.kz Абай облысы әкімінің баспасөз қызметіне сілтеме жасап.

Абай облысының ауыл шаруашылығы басқармасының басшысы Ертай Қуанбаевтың айтуынша, шегірткеге қарсы күрес облыстың 8 ауданында қарқынды жүргізілуде. Шегірткеге қарсы өңдеудің жалпы есептік ауданы 77,4 мың гектарды құрайды.

– Бүгінгі күнге зиянкестерге қарсы күрестке 1 аса жеңіл авиация және 13 жер үсті желдеткіш бүріккіштер жұмылдырылған. Үйірлі шегірткелерге қарсы күрес бойынша іс-шаралар 8 ауданда (Абай, Аягөз, Ақсуат, Бесқарағай, Бородулиха, Жарма, Көкпекті, Үржар және Жаңасемей аудандары) жүргізілуде. Қазіргі таңда 19,13 мың гектар жер (Азиялық шегіртке – 6,03 мың гектар, итальяндық прус – 13,1 мың гектар) өңделді, – деп атап өтті басқарма басшысы.

Ағымдағы жылы шегірткелерге қарсы іс-шараларға жергілікті бюджеттен тиісті қаражат бөлініп, «SATTI TULEK» ЖШС мердігер болып белгіленген.

– Саяқ зиянкестердің  таралу аумақтары бойынша 5 ауданда өңдеу басталып, 2 мың гектар жер өңделді. 12 маусымда Аягөз қаласының Қарауыл ауылының (Ақшатау ауылдық округі) автотрассасының 5-45 шақырымында, Ақсуат ауданының Қызылкесік ауылдық округінің аумағында шегірткенің таралуы байқалды, – деп қорытындылады Ертай Қуанбаев.

Ауыл шаруашылығы басқармасы аталған жерге 4 бүріккіш техниканы дер кезінде жіберіп, дәл уақытында өңдеу жұмыстарын жүргізіп, қауіпті алдын алуда. Сондықтан қазіргі уақытта  облыс бойынша ешқандай қауіп жоқ десе болады. Жалпы жағдай бақылауда, шегірткелердің кең таралуы күтілмейді.