11-16 shilde aralyǵynda Almaty qalasynda jol apattarynyń aldyn alý, jol qozǵalysyna qatysýshylardyń quqyqtyq mádenietin arttyrý jáne qoǵamdyq qaýipsizdikti qamtamasyz etý maqsatynda respýblikalyq "Qaýipsiz jol" jedel profilaktikalyq is-sharasy ótip jatyr, dep habarlaidy dalanews.kz.
Alty kúnge sozylatyn is-shara barysynda politsiia qyzmetkerleri kúsheitilgen rejimde qyzmet atqaryp, jol júrisi qaǵidalaryn óreskel buzý derekterin anyqtaýǵa erekshe nazar aýdarady.
Mas kúiinde kólik basqarý, qarsy qozǵalys jolaǵyna shyǵý, belgilengen jyldamdyqty asyrý, qaýipsizdik beldigin taqpaý, jaiaý júrginshilerdiń jol qozǵalysy qaǵidalaryn buzýy, sondai-aq, qoǵamdyq kólik, mototsikl jáne moped júrgizýshileri tarapynan jasalatyn quqyqbuzýshylyqtar qatań baqylaýǵa alynady.
"Joldaǵy qaýipsizdik árbir jol qozǵalysyna qatysýshynyń jaýapkershiliginen bastalady. Bizdiń basty mindetimiz - quqyqbuzýshylyqtardy anyqtap qana qoimai, qaiǵyly oqiǵalardyń aldyn alyp, adam ómirin saqtap qalý. Júrgizýshiler men jaiaý júrginshilerdi Jol júrisi qaǵidalaryn qatań saqtaýǵa shaqyramyz", – dedi Almaty qalasy Politsiia departamenti ákimshilik politsiia basqarmasynyń bastyǵy Ábdinur Tasybaev.
