Qazaq Expert Club sarapshylary "Ádilet" partiiasynyń "Ádiletti bolashaq úshin" atty sailaýaldy baǵdarlamasyna baǵa berdi. Olardyń pikirinshe, qujatta eldiń strategiialyq damý baǵyttary men qazaqstandyqtardyń kúndelikti turmysyna tikelei áser etetin naqty bastamalar úilesim tapqan, dep habarlaidy dalanews.kz.
Saiasattanýshy, professor Gúlmira Sultanbaeva bul baǵdarlamany jai ǵana sailaýaldy ýádeler jiyntyǵy emes, naqty maqsattary men ólshenetin kórsetkishteri aiqyndalǵan qujat dep baǵalady.
"Baǵdarlamada adami kapitaldy damytý men áleýmettik standarttardy arttyrýǵa erekshe mán berilgen. Bul onyń basty basymdyǵy – adam ekenin kórsetedi", – dedi sarapshy.
Onyń aitýynsha, baǵdarlamanyń mańyzdy baǵyttarynyń biri – memlekettik basqarýdy tsifrlyq transformatsiialaý. Bul tek memlekettik qyzmetterdi elektrondy formatqa kóshirýmen shektelmeidi. Baǵdarlamada sheshim qabyldaý protsesine jasandy intellekt pen tsifrlyq tehnologiialardy keńinen engizý usynylǵan. Bul biýrokratiialyq rásimderdi qysqartyp, adami faktordyń yqpalyn azaitýǵa ári memlekettik organdar jumysynyń ashyqtyǵyn arttyrýǵa múmkindik beredi.
Sarapshy baǵdarlamanyń negizgi bastamalarynyń qatarynda bes million qazaqstandyqty jasandy intellektimen jumys isteýge oqytý, AI Hub qurý jáne derekterdi qorǵaýdyń tsifrlyq quraldaryn damytý josparlaryn atady. Sondai-aq ol baǵdarlamanyń oryndalýyn naqty ýaqyt rejiminde baqylaýǵa múmkindik beretin tsifrlyq monitoring júiesin engizý bastamasyna erekshe toqtaldy. Bul qabyldanǵan mindetterdiń oryndalýy men qol jetkizilgen nátijelerdi turaqty qadaǵalaýǵa jol ashady.
Baǵdarlamada áleýmettik-ekonomikalyq damý boiynsha birqatar naqty maqsattar da belgilengen. Atap aitqanda, halyqtyń ortasha ómir súrý uzaqtyǵyn 77 jasqa deiin jetkizý, ár adamǵa shaqqanda 30 sharshy metr turǵyn úimen qamtamasyz etý, bir million sapaly jumys ornyn ashý jáne ekonomikadaǵy orta biznestiń úlesin 20 paiyzǵa deiin arttyrý kózdelgen.
Qazaq Expert Club-tyń taǵy bir sarapshysy, sý saiasaty salasynyń mamany Qýanysh Ózbekov baǵdarlamanyń sý infraqurylymyn damytýǵa arnalǵan bólimine nazar aýdardy.
Onyń pikirinshe, baǵdarlamanyń basty artyqshylyqtarynyń biri – nátijeni baǵalaýǵa múmkindik beretin naqty kórsetkishterdiń bolýy. Atap aitqanda, 2030 jylǵa qarai sýarmaly jer kólemin 2,5 million gektarǵa deiin ulǵaitý, shamamen 1,4 million gektar alqapta sý únemdeý tehnologiialaryn engizý, 42 jańa sý qoimasyn salý, taǵy 37 sý qoimasyn rekonstrýktsiialaý jáne 14,5 myń shaqyrym sýarý kanalyn tsifrlyq esepke alý men avtomattandyrylǵan basqarý júielerin engize otyryp jańǵyrtý josparlanǵan.
Sarapshynyń aitýynsha, búginde sýarmaly infraqurylymnyń tozýyna bailanysty sý resýrstarynyń edáýir bóligi ysyrap bolyp jatyr. Sondyqtan zamanaýi esepke alý jáne basqarý júieleri sýdy tiimdi paidalanýǵa ári shyǵyndy azaitýǵa múmkindik beredi.
Ol sondai-aq irrigatsiia jáne drenaj máselelerine arnalǵan jeke zań qabyldaý bastamasyn da oń baǵalady.
"Sý qaýipsizdigi máseleleri keshendi kózqaras pen uzaq merzimdi quqyqtyq retteýdi talap etedi", – dedi Qýanysh Ózbekov.
Jalpy, sarapshylardyń pikirinshe, "Ádiletti bolashaq úshin" sailaýaldy baǵdarlamasy tsifrlandyrý, ekonomika, áleýmettik saiasat jáne sý infraqurylymyn damytý baǵyttaryn bir arnaǵa toǵystyryp, olardy iske asyrýdyń naqty tetikterin usynady.
