Aqtóbede neke saraiynda óltirilgen 26 jastaǵy áiel tórt balany tárbielep ósirgen. Qaiǵyly oqiǵadan keiin olardyń ekeýi ýaqytsha balalar úiine ornalastyryldy, dep habarlaidy dalanews.kz.
KTK telearnasynyń málimetinshe, marqumnyń tórt balasynyń ekeýi kúdiktimen ortaq. Áiel qaitys bolǵannan keiin osy eki bala «Úmit» balalar úiine ýaqytsha ornalastyrylǵan. Al qalǵan eki balanyń kimniń qamqorlyǵynda ekeni ázirge belgisiz.
Aqtóbe oblystyq balalardyń quqyqtaryn qorǵaý basqarmasynyń basshysy Amangeldi Qonaqbaev balalardyń jaǵdaiy memlekettik organdardyń baqylaýynda ekenin aitty.
«Otbasy jaǵdailaryna bailanysty kámeletke tolmaǵan eki bala «Úmit» balalar úiine ýaqytsha ornalastyryldy. Bul jaǵdai oblystyq balalardyń quqyqtaryn qorǵaý basqarmasy men quzyrly organdardyń baqylaýynda», – dedi ol.
Qaiǵyly oqiǵaǵa ne sebep bolǵan?
Politsiianyń málimetinshe, qylmys jasady degen kúdikke marqumnyń burynǵy azamattyq nekedegi kúieýi ilingen. Ekeýi shamamen úsh jyl birge turǵan. Aldyn ala málimet boiynsha, olardyń arasynda ata-ana quqyǵynan bas tartý máselesine bailanysty janjal shyqqan. Degenmen oqiǵanyń naqty sebebi men basqa da mán-jaiy tergeý barysynda anyqtalady.
Eske salaiyq, 3 qarashada Aqtóbedegi neke saraiynda 26 jastaǵy áieldi óltirip ketken. Oqiǵa ornyna barǵan politsiia qyzmetkerleri kúdiktini ustap, ýaqytsha ustaý izoliatoryna qamady.
Atalǵan derek boiynsha qylmystyq is qozǵaldy. Qazir tergeý amaldary jalǵasyp jatyr.
