Qazaqstan Respýblikasy Bas prokýratýrasy men Ulttyq qaýipsizdik komitetiniń qyzmetkerleri Qazaqstannyń Grýziiadaǵy Elshiliginiń qoldaýymen atalǵan elden asa iri mólsherde alaiaqtyq jasaǵany, sondai-aq jalǵan meditsinalyq buiymdardy iri mólsherde óndirgeni jáne ótkizgeni úshin qylmystyq jaýaptylyqqa tartý maqsatynda Qazaqstan azamatyn ekstraditsiialady, dep habarlaidy dalanews.kz.
Tergeý barysynda kúdiktiniń memlekettik meditsinalyq uiymdardyń meditsinalyq jabdyqtardy satyp alý jónindegi tenderlerinde basymdylyqqa ie bolý maqsatynda otandyq taýar óndirýshi mártebesin zańsyz alý shemasyn uiymdastyrǵany anyqtaldy.
Atap aitqanda, ol naqty óndiristi uiymdastyrmai, meditsinalyq tehnikanyń Qazaqstanda óndiriletini týraly ýákiletti memlekettik organdarǵa jalǵan málimetter usynǵan. Nátijesinde sheteldik jinaqtaýshy bólshekterden qurastyrylǵan meditsinalyq tehnika memlekettik meditsinalyq uiymdarǵa otandyq ónim retinde ótkizilip, memleketke 4,5 mlrd teńgeden astam zalal keltirilgen.
Qylmystardy jasaǵannan keiin kúdikti qylmystyq qýdalaý organdarynan jasyrynyp, osyǵan bailanysty halyqaralyq izdeýge jariialanǵan.
Aǵymdaǵy jyldyń naýryz aiynda ol Grýziia aýmaǵynda ustalyp, Bas prokýratýranyń suraý salýy boiynsha Qazaqstanǵa ekstraditsiialandy. Qazirgi ýaqytta kúdikti tergeý izoliatoryna qamaýǵa alyndy. Oǵan taǵylǵan qylmystardy jasaǵany úshin múlki tárkilenip, on jylǵa deiingi merzimge bas bostandyǵynan aiyrý jazasy kózdelgen.
Eske sala keteiik, jyl basynan beri Grýziiadan 7 adam ekstraditsiialandy, olardyń 5-i jymqyrý úshin izdeýde bolǵan.
