Ulttyq ulannyń "Búrkit" arnaiy jasaǵy tarihynda alǵash ret qyz jaýynger qyzmetke kiristi, dep habarlaidy dalanews.kz.
"Kitana" búrkenshik esimimen tanylǵan Qymbat halyqaralyq jarystarda el namysyn qorǵap, endi bedeldi arnaiy jasaqtyń jaýyngeri atandy.
Qymbattyń "Búrkit" jasaǵyna kelýi Dýbaida ótken SWAT Challenge halyqaralyq jarysymen bailanysty. Ol bul dodada Qazaqstan atynan óner kórsetken "Tomiris" qyzdar komandasy quramynda baq synady. Áielder arasyndaǵy sanatta qazaqstandyq komanda qarsylastarynan ozyp, birinshi oryndy ielendi. Al jalpy komandalyq esepte 18-orynǵa turaqtap, birqatar erler quramalarynan joǵary nátije kórsetti.
Jarys barysynda mergendigimen kózge túsken Kitanaǵa "Búrkit" arnaiy jasaǵy usynys tastaǵan. Ol kóp oilanbastan kelisim berip, bólimshe tarihyndaǵy alǵashqy qyz áskeri qyzmetshi atandy.
Qymbattyń sporttaǵy jetistikteri de az emes. Ol - qoian-qoltyq urystan alty dúrkin Qazaqstan chempiony, álem chempionatynyń kúmis jáne eki márte qola júldegeri, álem kýbogy, Eýropa, Aziia chempionattarynyń kúmis júldegeri.
Djiý-djitsýdan úsh dúrkin álem, Aziia chempiony jáne eki dúrkin Eýropa chempiony atanǵan. MMA boiynsha Qazaqstan jáne Aziia chempiony, jaýyngerlik sambodan el chempiony ári álem chempionatynyń qola júldegeri.
Budan bólek, Dúniejúzilik politsiia oiyndarynda dziýdodan altyn, djiý-djitsýdan kúmis medal jeńip alǵan. Qoian-qoltyq urys, djiý-djitsýdan halyqaralyq dárejedegi sport sheberi, sambo men MMA-dan sport sheberi.
Qazir Qymbattyń alǵa qoiǵan basty maqsaty - kúreń beret synaǵynan súrinbei ótý. Bul synaq jaýyngerdiń dene daiyndyǵyn, tózimdiligin talap etedi. Maqsatyna jetse, ol Ulttyq ulan tarihynda kúreń beretke qol jetkizgen alǵashqy qyz jaýynger atanbaq.
