Qazaqstanda biryńǵai ýaqyt beldeýine kóshkennen keiin elektr energiiasyn tutyný shamamen 1-1,5 paiyzǵa artqan. Bul týraly Energetika ministri Erlan Aqkenjenov baspasóz máslihatynda málimdedi, dep habarlaidy dalanews.kz.
Parýz.kz jýrnalisi ýaqyt beldeýi ózgergennen keiin Astana men birqatar óńir turǵyndarynyń kúndiz jaryq jaǵýǵa májbúr bolyp otyrǵanyn aitty. Ol elordadaǵy úi sharýashylyqtarynyń buryn jáne qazir qansha elektr energiiasyn tutynatynyn, otbasylardyń únemdegenin nemese qosymsha shyǵynǵa ushyraǵanyn kórsetetin naqty esep bar-joǵyn surady.
Ministrlik ókili el boiynsha elektr energiiasyn tutyný kóleminiń artqanyn rastady. Onyń sózinshe, buǵan deiin júrgizilgen baǵalaý tutyný deńgeiiniń shamamen 1-1,5 paiyzǵa óskenin kórsetken.
"Shynymdy aitsam, siz aityp otyrǵan aýqymdy fleshmobtardy kórgen joqpyn. Elektr energiiasyn tutyný boiynsha azdaǵan ósim bar. Ony shamamen 1-1,5 paiyz dep baǵalaǵan edik", – dedi vedomstvo ókili.
Ol Astana turǵyndarynyń tústen keiin jaryq jaǵýǵa májbúr bolyp otyrǵanyn baiqamaǵanyn da aitty.
"Ózim de úi iesimin. Meniń úiimde tústen keiin eshkim jaryq jaqpaidy", – dedi ol.
Buǵan jýrnalist baspasóz máslihaty ótip jatqan zalda saǵat 13:00-de jaryq qosylyp turǵanyn eske saldy. Alaida moderator bul másele jiyn taqyrybyna qatysy joq ekenin aityp, kelesi suraqqa kóshýdi surady.
