Qazaqstanda stýdentterge jataqhanadan oryn bólýdi jeńildetetin biryńǵai tsifrlyq platforma ázirlenip jatyr. Bul týraly Quryltai depýtaty Nurgúl Taý málimdedi, dep habarlaidy dalanews.kz.
Depýtattyń aitýynsha, jyl saiyn tamyz aiynda stýdentterden jataqhanaǵa qatysty kóptegen ótinish túsedi. Biri bos oryn tappai sabylsa, endi biri kezeginiń qashan keletinin bilmei, páter jaldaýǵa májbúr bolady.
"Stýdentterdiń qaida ornalasatynyn, kimmen turatynyn jáne jataqhanadan qashan oryn alatynyn surap, alańdaitynyn túsinemin. Alaida olardyń basty maqsaty baspana izdeý emes, bilim alyp, tańdaǵan mamandyǵyn meńgerý bolýy kerek. Ókinishke qarai, qazir kóp stýdent úshin birinshi kezektegi másele – turatyn jer tabý", – dedi Nurgúl Taý.
Ol bul máseleni sheshý úshin jataqhana oryndaryn bólýdi ashyq ári qolaily etetin biryńǵai platforma qurý týraly depýtattyq saýal joldaǵan. Usynys Úkimet tarapynan qoldaý taýyp, júieni ázirleý jumysy bastalǵan.
Joba Jasandy intellekt jáne tsifrlyq damý vitse-ministri Baqtiiar Máken jáne Ǵylym jáne joǵary bilim vitse-ministri Dinara Sheglovanyń qatysýymen júzege asyrylyp jatyr.
Júie iske qosylǵannan keiin stýdentter jataqhanalardaǵy bos oryndardy poiyzǵa nemese ushaqqa bilet tańdaǵandai onlain kóre alady. Olar ótinish berip, kezegin baqylap, bólmede qansha adammen birge turatynyn da tańdai alady. Keiinirek orynǵa aldyn ala tapsyrys berý múmkindigin engizý josparlanǵan.
"Jataqhana máselesin jyl saiyn qaita-qaita kótere bergennen nátije bolmaidy. Júieni ózgertý qajet. Buǵan deiin jataqhana ǵimarattarynyń jaǵdaiyna nazar aýdaryp, birqatar túitkildiń sheshilýine yqpal ettik. Endi oryn bólýdiń ózin ashyq ári ádil etýge kezek keldi", – dedi depýtat.
Nurgúl Taý stýdent jataqhana alý úshin áýre-sarsańǵa túspeýi kerek dep esepteidi.
"Stýdenttiń basty mindeti – oqý. Biz oǵan alańsyz bilim alýǵa jaǵdai jasaýymyz kerek. Bul bastama sóz júzinde qalmai, naqty júzege asýy mańyzdy. Eger qandai da bir kedergi nemese suraq týyndasa, maǵan habarlasyńyzdar. Birge kóterip, sheshimin birge izdeýge daiynmyn", – dedi ol.
