قازاقستاندا ستۋدەنتتەرگە جاتاقحانادان ورىن بٶلۋدٸ جەڭٸلدەتەتٸن بٸرىڭعاي تسيفرلىق پلاتفورما ەزٸرلەنٸپ جاتىر. بۇل تۋرالى قۇرىلتاي دەپۋتاتى نۇرگٷل تاۋ مەلٸمدەدٸ, دەپ حابارلايدى dalanews.kz.
دەپۋتاتتىڭ ايتۋىنشا, جىل سايىن تامىز ايىندا ستۋدەنتتەردەن جاتاقحاناعا قاتىستى كٶپتەگەن ٶتٸنٸش تٷسەدٸ. بٸرٸ بوس ورىن تاپپاي سابىلسا, ەندٸ بٸرٸ كەزەگٸنٸڭ قاشان كەلەتٸنٸن بٸلمەي, پەتەر جالداۋعا مەجبٷر بولادى.
"ستۋدەنتتەردٸڭ قايدا ورنالاساتىنىن, كٸممەن تۇراتىنىن جەنە جاتاقحانادان قاشان ورىن الاتىنىن سۇراپ, الاڭدايتىنىن تٷسٸنەمٸن. الايدا ولاردىڭ باستى ماقساتى باسپانا ٸزدەۋ ەمەس, بٸلٸم الىپ, تاڭداعان ماماندىعىن مەڭگەرۋ بولۋى كەرەك. ٶكٸنٸشكە قاراي, قازٸر كٶپ ستۋدەنت ٷشٸن بٸرٸنشٸ كەزەكتەگٸ مەسەلە – تۇراتىن جەر تابۋ", – دەدٸ نۇرگٷل تاۋ.
ول بۇل مەسەلەنٸ شەشۋ ٷشٸن جاتاقحانا ورىندارىن بٶلۋدٸ اشىق ەرٸ قولايلى ەتەتٸن بٸرىڭعاي پلاتفورما قۇرۋ تۋرالى دەپۋتاتتىق ساۋال جولداعان. ۇسىنىس ٷكٸمەت تاراپىنان قولداۋ تاۋىپ, جٷيەنٸ ەزٸرلەۋ جۇمىسى باستالعان.
جوبا جاساندى ينتەللەكت جەنە تسيفرلىق دامۋ ۆيتسە-مينيسترٸ باقتييار مەكەن جەنە عىلىم جەنە جوعارى بٸلٸم ۆيتسە-مينيسترٸ دينارا ششەگلوۆانىڭ قاتىسۋىمەن جٷزەگە اسىرىلىپ جاتىر.
جٷيە ٸسكە قوسىلعاننان كەيٸن ستۋدەنتتەر جاتاقحانالارداعى بوس ورىنداردى پويىزعا نەمەسە ۇشاققا بيلەت تاڭداعانداي ونلاين كٶرە الادى. ولار ٶتٸنٸش بەرٸپ, كەزەگٸن باقىلاپ, بٶلمەدە قانشا اداممەن بٸرگە تۇراتىنىن دا تاڭداي الادى. كەيٸنٸرەك ورىنعا الدىن الا تاپسىرىس بەرۋ مٷمكٸندٸگٸن ەنگٸزۋ جوسپارلانعان.
"جاتاقحانا مەسەلەسٸن جىل سايىن قايتا-قايتا كٶتەرە بەرگەننەن نەتيجە بولمايدى. جٷيەنٸ ٶزگەرتۋ قاجەت. بۇعان دەيٸن جاتاقحانا عيماراتتارىنىڭ جاعدايىنا نازار اۋدارىپ, بٸرقاتار تٷيتكٸلدٸڭ شەشٸلۋٸنە ىقپال ەتتٸك. ەندٸ ورىن بٶلۋدٸڭ ٶزٸن اشىق ەرٸ ەدٸل ەتۋگە كەزەك كەلدٸ", – دەدٸ دەپۋتات.
نۇرگٷل تاۋ ستۋدەنت جاتاقحانا الۋ ٷشٸن ەۋرە-سارساڭعا تٷسپەۋٸ كەرەك دەپ ەسەپتەيدٸ.
"ستۋدەنتتٸڭ باستى مٸندەتٸ – وقۋ. بٸز وعان الاڭسىز بٸلٸم الۋعا جاعداي جاساۋىمىز كەرەك. بۇل باستاما سٶز جٷزٸندە قالماي, ناقتى جٷزەگە اسۋى ماڭىزدى. ەگەر قانداي دا بٸر كەدەرگٸ نەمەسە سۇراق تۋىنداسا, ماعان حابارلاسىڭىزدار. بٸرگە كٶتەرٸپ, شەشٸمٸن بٸرگە ٸزدەۋگە دايىنمىن", – دەدٸ ول.
