Almaty Politsiia departamenti áiel adam qyzmettik mindetin atqaryp júrgen politsiia qyzmetkerine qatysty arandatýshylyq áreket jasaǵanyn málimdedi, dep habarlaidy dalanews.kz.
Ol politseidiń formasyn Helloýin kostiýmine balaǵan. Nátijesinde ázil retinde bastaǵan áreketi ákimshilik jaýapkershilikke ulasyp, 130 myń teńgege jýyq aiyppulmen aiaqtaldy.
Oqiǵa 31 qazanda keshki ýaqytta Arbat jaiaý júrginshiler kóshesinde bolǵan. Sol kúni ýchaskelik politsiia inspektory merekelik is-sharalar kezinde qoǵamdyq tártip pen turǵyndardyń qaýipsizdigin qamtamasyz etip júrgen. Osy kezde oǵan qolyna kamera ustaǵan áiel kelip, politseidiń formasy "Helloýin kostiými emes pe?" dep ádeii suraq qoiǵan.
Politsiia qyzmetkeri sabyr saqtap, ózin tanystyryp, qyzmettik kýáligin kórsetkennen keiin jumysyn jalǵastyrǵan. Alaida oqiǵa túsirilgen video áleýmettik jelide jariialanyp, jaǵdai jeli qoldanýshylarynyń nazaryna usynylǵan. Video avtoryn Almaly aýdandyq politsiia basqarmasynyń qyzmetkerleri anyqtady. Ol Almaty qalasynyń 47 jastaǵy turǵyny bolyp shyqty.
Áiel ákimshilik jaýapkershilikke tartyldy. Sot sheshimimen oǵan 30 AEK mólsherinde aiyppul salyndy.
