Jetisý oblysynda Memlekettik rámizder kúni saltanatty túrde atalyp ótti. Negizgi shara retindegi Táýelsizdiktiń 35 jyldyǵyna orai «35 aýyl – 35 Tý tuǵyry» patriottyq aktsiiasy aiasynda aýdan-qalalardaǵy 35 eldi mekende bir mezette telekópir bailanysy arqyly 35 jańa tý tuǵyry ashylyp, Tý kóterildi. Bul tý tuǵyrlary jergilikti metsenattar men kásipkerlerdiń qoldaýymen ornatyldy, dep habarlaidy dalanews.kz.
Oblys kóleminde keńinen atap ótilgen patriottyq is-sharalarǵa jalpy sany 3,5 myńǵa jýyq adam qatysty, onyń myńnan astamy oblys ortalyǵynda jinaldy.
Taldyqorǵan qalasyndaǵy «Jastar» saiabaǵy alańynda biiktigi 92 metrlik tý tuǵyrynda ornatylǵan Memlekettik Týdy kóterý saltanaty ótti.
Merekelik sharaǵa Jetisý oblysynyń ákimi Beibit Isabaev, máslihat depýtattary, ardagerler, memlekettik qyzmetshiler, ziialy qaýym ókilderi, quqyq qorǵaý organdarynyń qyzmetkerleri, áskeri qyzmetshiler, sportshylar, jastar, qala turǵyndary qatysty.
Memlekettik Tý kóterilgen sátte Taldyqorǵan áskeri garnizonynyń úrmeli orkestriniń súiemeldeýimen kameralyq hor men oblystyq filarmoniia ártisteri Qazaqstan Respýblikasynyń Ánuranyn oryndady. Sonymen qatar jergilikti shyǵarmashylyq ujymdardyń oryndaýynda patriottyq ánder shyrqaldy.
Jalpy, Taldyqorǵandaǵy Tý tuǵyrynyń biiktigi kezdeisoq tańdalmaǵan. Onyń 92 metr bolýy - táýelsiz Qazaqstannyń memlekettik rámizderi bekitilgen 1992 jyldyń simvoldyq belgisi. Memlekettik Týdyń uzyndyǵy – 25 metr, eni – 12 metr. Kompozitsiianyń tuǵyr bóliginde Qazaqstan kartasy beinelengen. Tý tuǵyry Memlekettik Týdy avtomatty túrde kóterýge arnalǵan arnaiy mehanizmmen jabdyqtalǵan bolat konstrýktsiiadan turady. Onyń janynda saltanatty is-sharalardy ótkizýge arnalǵan amfiteatr ornalasqan.
Patriottyq aktsiiaǵa qatysqan óńirdiń aýdan-qalalarynyń turǵyndary bul bastamanyń mańyzdylyǵyn atap ótip, pikirlerin bildirdi.
- Memlekettik rámizder – bizge ata-babamyzdan jetken mura ári bizdiń basty qundylyǵymyz. Memlekettik Týlardyń bir mezette kóterilgenin kórý óte áserli boldy, - dedi Taldyqorǵan qalasyndaǵy № 18 mektep-litseiiniń oqýshysy Aqqoja Nuráli.
- Men «Jasyl el» jastar ekologiialyq qozǵalysynyń múshesimin. Búgin Memlekettik Rámizder kúnine arnalǵan sharaǵa qatysýǵa keldim. Bul merekeniń biz úshin mańyzy zor. Óitkeni rámizder - bizdi tarihymyzdy qadirleýge, Otanǵa degen súiispenshilikti eseleýge úiretetin elimizdiń simvoly, - dedi Taldyqorǵandaǵy № 12 mektep-gimnaziianyń oqýshysy, volonter Aiaýlym Ashatqyzy.
- Búgin - bizdiń aýdanymyz úshin erekshe kún. Memlekettik rámizder kúninde aýylymyzǵa Tý tuǵyry ornatyldy. Bul Tý tuǵyry aýylǵa kire beris jerdegi mádeniet úii men sport kesheni ornalasqan ortalyqqa qoiyldy. Týdyń kúnde jelbirep turǵanyn kórý bolashaq chempiondarǵa, ónrpazdarǵa, jalpy aýyl halqyna úlken shabyt berip, maqsattaryna jetýge talpyndyrady dep oilaimyn, - dedi Qaratal aýdany Eskeldi bi aýylynyń turǵyny Murat Berikboluly.
- Búgin bizdiń aýylda jańa Tý tuǵyrynan Memlekettik Tý kóterildi. Rámizderdi nasihattaýdyń urpaqty tárbieleýdegi róli úlken. Sondyqtan aýylymyzda osyndai mańyzdy oryn ashylǵanynan qýanyshtymyz, - dedi pedagog, Alakól aýdany Jylandy aýylynyń turǵyny Elmira Rapilova.
- Jolaman aýylynda jańa Memlekettik Tý jańa biik tuǵyrǵa kóterilgenine kýá boldyq. Kók bairaǵymyz – Táýelsizdigimizdiń simvoly, el birligi men bolashaqqa degen senimniń belgisi. Memlekettik rámizderge kórsetilgen qurmet ár azamattyń boiynda Otanǵa degen súiispenshilik pen maqtanysh sezimin arttyrady. Tý tuǵyryn ornatý jas urpaqqa patriottyq tárbie berýdiń de mańyzdy úlgisi dep bilemin. Ony ornatý jobasyna atsalysqan azamattardyń bárine rizashylyǵymyzdy bildiremiz, - dedi Kerbulaq aýdany Jolaman aýylynyń turǵyny Didar Dihanbaev.
- Búgin el kóleminde ótip jatqan Rámizder kúnin biz, Aqsý aýdanynyń turǵyndary laiyqty atap ótip otyrmyz. Osy aýdannyń 5 birdei eldi mekeninde – Eginsý, Matai, Qyzylaǵash, Arasan, Kóshkental aýyldarynda jańa Tý tuǵyry ashylyp, olardan Tý biikke kóterildi. Saltanatty sharaǵa ásirese jastarymyzdyń, oqýshylardyń belsendi qatysqanyna qýandyq. Bul olardyń el bolashaǵyna degen jaýapkershilikti sanaly túrde sezinetinin bildiredi, - dedi Qyzylaǵash aýylynyń turǵyny Áshimǵali Jumageldi.
- «Jeńis» saiabaǵy - Eskeldi aýdanyndaǵy eń kórikti oryndardyń biri. Búgin osy jerde Memlekettik Týymyzdyń biik tuǵyrǵa kóterilgenin kórip, erekshe tolqydyq. Aýyl bolyp jinalyp bárimiz tamashaladyq. Kók bairaǵymyz saiabaqqa erekshe sán berip tur. Osyndai sátter elge degen maqtanyshymyzdy arttyra túsedi. Týymyz árdaiym asqaqtap, elimiz aman bolsyn, - dedi Qarabulaq aýylynyń turǵyny Sáýle Amantaeva.
