Jaqyn kúnderi KHDR áskeri kúshteri Ýkrainaǵa qarsy soǵysqa qatysady. Bul týraly 25 qazanda Ýkraina prezidenti Vladimir Zelenskii Telegram arnasynda jazdy, - dep habarlaidy Dalanews.kz "Ýkrainskaia pravda" basylymyna siltep.
"Ýkrainalyq barlaý qyzmetiniń málimetinshe, 27-28 qazanda Resei alǵash ret Soltústik Koreia áskeri kúshterin soǵys aimaqtarynda qoldanady", - dep jazdy Zelenskii.
Máskeýdiń osy qadamyna bailanysty Ýkraina prezidenti Batys odaqtastaryn Máskeý men Phenian úkimetterine qysym kórsetýge shaqyrdy.
Aita keteiik, 18 qazanda Ońtústik Koreia barlaý qyzmeti Pheniannyń Reseige jalpy sany 12 myń sarbazdan turatyn tórt brigadany, sonyń ishinde arnaiy kúshter otriadtaryn jiberý týraly sheshimin habarlady. Birneshe kúnnen keiin Zelenskii Soltústik Koreia soǵysqa naqty qosylǵanyn málimdedi.
23 qazanda AQSh Qorǵanys ministri Lloid Ostin Pentagonda Soltústik Koreia áskeriniń Reseide ekeni týraly dálelder baryn aitty. Olar Primorsk ólkesinde jáne Kýrsk oblysynda baiqalǵany habarlandy.
Al Phenian Ýkrainaǵa qarsy soǵysqa qatysý úshin áskerin Reseige jiberetini týraly habarlamalardy resmi túrde joqqa shyǵardy, mundai aqparatty "negizsiz qaýeset" dep atady.
