Qazaqstanda zeinet jasyndaǵy jáne zeinetaldy jastaǵy azamattarǵa nesie berý tártibi kúsheitiledi. Endi olar nesie rásimdeý úshin bank bólimshesine jeke ózi kelýi tiis, dep habarlaidy dalanews.kz.
Bul týraly Ulttyq bank tóraǵasy Timýr Súleimenov málimdedi. Onyń aitýynsha, jańa talap zeinet jasyndaǵy jáne zeinetaldy jastaǵy qazaqstandyqtarǵa qatysty qoldanylady.
Ulttyq bank basshysy bank qyzmetkeri klientpen áńgimelesý barysynda onyń alaiaqtardyń yqpalynda bolýy múmkin ekenin baiqasa jáne azamat nesieniń naqty maqsatyn túsindire almasa, qarjy uiymy nesie berýden bas tartýǵa mindetti bolatynyn aitty.
«Mundai jaǵdaida nesie berýden bas tartý bank úshin mindetti talap bolady», – dedi Timýr Súleimenov.
Ol bul talaptardyń saqtalýyn Qarjy naryǵyn retteý jáne damytý agenttigi (QNRDA) bank qadaǵalaýy aiasynda baqylap otyratynyn atap ótti. Ulttyq bank tóraǵasynyń sózinshe, engizilip otyrǵan sharalar alaiaqtardyń áreketinen halyqtyń eń osal sanattaryn qorǵaýǵa baǵyttalǵan.
