«23 jyl boiy Dúniejúzi qazaqtary qaýymdastyǵynda eńbek ettim. Qyryqqa jýyq elderde turatyn qazaq diasporasynyń myńdaǵan ókilderimen tanysyp, biraz elderdi aralap kórdim.
Eńbegim de baǵalandy. Marqum Qalekeńniń, Talǵat Asylulynyń kóptegen jaqsylyqtaryn kórdim, aǵalaryma alǵysym sheksiz! Armanym joq. Qaýymdastyqtyń Almatydan Astana qalasyna kóshýine orai ol jaqqa barýdan bas tarttym. Men ǵana emes, qaýymdastyqtyń 98 paiyz qyzmetkerleri solai jasady.
Qaýymdastyqtyń búgingi basshylyǵynan orys tilindegi jibergen ývedomleniesine zań boiynsha oryssha jaýap berdik.
Sheteldegi aǵaiyndar men elge oralyp jatqan qandastarymyzǵa əli de bolsa tegin aqyl keńes berýge əzirmin. Barlyq qazaq meniń jalǵyzym!
Ultymyzdyń birligi, jerimizdiń satylmaýy, jalǵa berilmeýimen tilimiz úshin eńbektenemin!», – deidi Botagóz Ýatqan.
Iá, qaýymdastyqtyń biraz jumys atqarǵanyn bilemiz. Biraq sońǵy kezderi qaýymdastyqtyń eks-tóraǵasy Talǵat Mamashevtyń birneshe oralmanmen júz shaiysyp, daýlasqanyn da bilemiz. Sońǵy ýaqyttary qaýymdastyq sheteldegi qazaqtardyń múddesin qorǵaýda áljýazdyq tanytqany jasyryn emes. Sheteldi qoiyp, elge kelgen oralmandardyń múddesin qoǵaýda qaýymdastyq qaýqarsyzdyq tanytty.
Sondyqtan Botagóz Ýatqan aitqandai, Talǵat Mamashev kezinde qaýymdastyq tiimdi jumys istedi dep aita almaimyz.
Qaýymdastyqtyń jumysynyń qojyraýy Talǵat Mamashevtyń qoǵamdyq ortada saiasi salmaǵynyń kemýi, bilikke batyl talap qoia almaýy sebep bolǵany jasyryn emes.
Al qaýymdastyq basshysy bolyp jańadan taǵaiyndalǵan Zaýytbek Turysbekovtyń elimizdiń qoǵamdyq-saiasi ómirinde ájeptáýir bedeli bar azamat ekenin bilemiz. Buǵan deiin ministr, ákim, elshi bolyp, úlken laýazymdy qyzmetterdi atqarǵan Zaýytbek Turysbekov osy qyzmetke qyzyǵýshylyq tanytyp, yqylasyn salyp jumys istese, biraz máseleni sheshetindei saiasi salmaǵy bar.
Biraq qaýymdastyqtyń qyzmetkerlerine orys tilinde hat jibergenin qazaqy orta qoldamaidy. Árine, bul úlken qatelik. Taza qazaqtyń máselesimen ainalysatyn uiymnyń jumysynda qai ýaqytta bolsa da qazaq tili ústem turýy kerek. Sondyqtan muny Turysbekovtyń qol astyndaǵy qyzmetkerlerdiń jibergen qateligi dep qabyldaimyz. Olai dep bailam jasaiyq desek, hattyń sońynda Zaýytbek Turysbekovtyń qoly tur.
Eger bul jaǵdaidy der kezinde túzemese, Zaýytbek myrzanyń basy biraz daýǵa qalý múmkin.
Nurlan JUMAHAN
